Vazhdon eksodi “falas” nga Superiorja, klubet shqiptare humbin qindra mijëra euro
Emanuel Mensah, deri pak javë më parë, ishte një futbollist i Laçit në Kategorinë Superiore. Sot, ai është prezantuar te Atromitos në kampionatin grek të futbollit. Cili është problemi? Që klubi i Laçit përfiton 0 euro nga ky transferim, falë klauzolave absurde që u vihen futbollistëve në kontrata.
Pak kohë më parë, të gjithë u çuditën që Rubin Hebaj u largua drejt Domzhales në Slloveni duke firmosur me këtë klub dhe ndërprerë marrëveshjen ekzistuese që kishte me Vllazninë. Futbollisti kishte në kontratë klauzolën absurde që mund të largohej kurdoherë, nëse kishte një ofertë nga jashtë vendit tonë.
Të njëjtën klauzolë duket se ka pasur edhe Mensah te Laçi. Lojtari erdhi në janar dhe tregoi menjëherë te kurbinasit se ishte një futbollist shumë cilësor. Por në vend që të blindonte lojtarin në mënyrë që të përfitonte financiarisht prej tij në të ardhmen, Laçi thjesht e ka parë atë të largohet pa u shqetësuar drejt Greqisë për të firmosur në elitën e kampionatit të këtij vendi.
Si në rastin e Hebajt, ashtu edhe të Mensah, klubet shqiptare kanë humbur mundësinë që të arkëtojnë disa qindra mijëra euro, të cilat sigurisht që do t’i ndihmonin të përballonin pa probleme sezonin në një kampionat si i yni ku financat janë shqetësimi kryesor.
NDIQE LIVE "PANORAMA TV"