I dëshpëruar për mënyrën se si ekipi u ndëshkua, trajneri grek i Luftëtarit, Jorgos Marantas, deklaroi për “Panorama Sport” se skuadra e tij nuk e meritonte të pësonte në atë mënyrë.

“E dija që do të ishte një ndeshje e vështirë. Bylisi nuk ishte më i mirë se ne në fushën e lojës, por në letër ka pikët dhe kjo u jepte përparësi nga ana psikologjike. Në fillimin e pjesës së parë na krijuan dy raste, pastaj patëm edhe ne momentet tona të mira. Të njëjtën gjë bëmë edhe në pjesën e dytë, ku e nisëm të qetë dhe shënuam gol.

Unë e them me bindje se nuk mund të jepej një penallti e tillë, por nuk jam unë që vendos për këtë gjë. Sa i përket moskryerjes së zëvendësimit, të dyja tabelat elektronike nuk punonin.

Kam bindje të plotë se Luftëtari do të rikthehet te fitorja shumë shpejt, pasi lojtarët po tregojnë personalitet nga ndeshja në ndeshje dhe ky fakt më gëzon”, përfundoi Marantas, i cili në minutat e fundit të ndeshjes së djeshme ishte shumë i acaruar me arbitrat, për shkak të mohimit të zëvendësimit.

PANORAMASPORT.AL

NDIQE LIVE "PANORAMA TV"

---