U aktivizua edhe Rrapaj, Skënderbeu barazon në miqësoren ndaj skuadrës kosovare
Skënderbeu barazon në testin miqësor të luajtur ditën e djeshme në “Tropikal Resort” kundër Llapit të Kosovës. Një takim i katërt ky për Ahmatajn që ka kërkuar të shohë edhe një herë lojtarët, të cilët me shumë mundësi do të mund të jenë pjesë e korçarëve edhe në sezonin e ri, pavarësisht se vijojnë ende afrimet në masë për provë te korçarët.
Ndeshja ka nisur me formacionin më të mirë të mundshëm për Ahmatajn me vetëm disa ndryshime, siç ishte futja e Bogdanit dhe Zhelekut si titullarë. Gjithsesi, ndeshja ka filluar më mirë për kosovarët, të cilët kalojnë në avantazh në minutën e 16-të me anë të Jonuzit. Të besuarit e Ahmatajt mundohen të reagojnë dhe arrijnë të krijojnë raste për shënim si me sulmuesit e linjës së parë ashtu edhe me Bicajn në një rast zhvillimi të një goditjeje këndi.
Pjesa e parë mbyllet me fitoren e Llapit, ndërsa në pjesën e dytë Ahmataj e nis me shumë zëvendësime, duke u dhënë hapësirë lojtarëve të rinj. Pikërisht nga stoli vjen edhe goli i barazimit për korçarët. Është pikërisht Tereziu, i cili pas një lëvizjeje të bukur hyn në zonë dhe shënon golin e barazimit.
Skënderbeu vijon të shohë nga sulmi, por kundërshtarët janë të vendosur mirë dhe mbrojnë deri në fund rezultatin që nuk ndryshon. Mbyllet kështu me barazim testi i katërt miqësor për Ahmatajn që ka kërkuar dhe ka marrë disa përgjigje pozitive nga lojtarët e vet.
PANORAMASPORT.AL
NDIQE LIVE "PANORAMA TV"