Tri oferta në tavolinë/ Jasir Asani vendos të ardhmen brenda kësaj jave
Partizani me datë 15 qershor nis grum bullimin në Ohër për t’u përgatitur për pjesëmarrjen në Kupat e Europës. Të kuqtë e Ilir Dajës kanë mbetur shumë pak, pasi kontigjenti i “demave” është shkrirë thuajse i gjithi, për shkak të kontratave që kanë mbaruar.
Zyrtarisht, nën kontratë me klubin janë vetëm Loti Celina, Geri Selita, Valentino Murataj, Kristi Kote, Ferhan Hasani, Tedi Cara dhe Stenio Zhunior. Duke parë situatën, drejtuesit e të kuqve kanë filluar të mendojnë fillimisht për rinovimet me lojtarët e mbetur në klub, e më pas kanë filluar të mendojnë edhe për afrimet. Sa u takon rinovimeve, e gjithë vëmendja është te Jasir Asani.
ASANI – Rinovimi i 26- vjeçarit është kryefjalë në futbollin shqiptar ditët e fundit dhe të gjithë po presin të mësojnë se cila do të jetë e ardhmja e mëngjarashit të kuq. Situata aktuale, është e tillë: Tri oferta në tavolinë dhe pritje e nisjes së bisedimeve me Partizanin. “Asi” i kuq ka kërkuar të jetë lojtari më i paguar në Superiore në rast se Partizani do të dojë ta mbajë në ekip, ndërsa ekipeve të tjera që janë interesuar për të dhe kanë pasur kontakte, u ka kërkuar të presin deri ditën e shtunë. Pra, Asani do të vendosë për të ardhmen e tij brenda kësaj jave.
Hungari, Rusi dhe Turqi janë kampionatet ku militojnë ekipet që duan Asanin. Madje, skuadra hungareze i ka bërë dhe një ofertë të mirë financiare, por pa biseduar fillimisht me Partizanin, Asani nuk do të vendosë. Afati që drejtuesit e “demave” kanë, është deri të shtunën…
RINOVIMET – Edhe pse situata duket e vështirë te Partizani sa u takon futbollistëve pa kontratë, optimizmi është i lartë për të rinovuar me dy mbrojtësit, Esin Hakaj dhe Egzon Belica.
Të dy këta futbollistë kanë qenë titullarë të padiskutueshëm nën urdhrat e Dajës dhe pritet të firmosin me Partizanin sapo të rikthehen nga pushimet për të vazhduar bashkëpunimin me klubin e kuq. Ndërsa, sa u takon dy mbrojtësve të tjerë, Bitri është pranë akordit me Dinamo Brest, ndërsa Idrizaj nuk bën pjesë në planet e Dajës dhe vështirë se mund të rinovojë.
VERONIK ISTREFAJ – PANORAMASPORT.AL
NDIQE LIVE "PANORAMA TV"