Tre kandidatë për stolin e Elbasanit, ja kush është favoriti për drejtimin e skuadrës
Brenda javës, Elbasani do të zgjedhë edhe trajnerin për sezonin e ardhshëm. Me Shkëlqim Lleshanakun që i ka mbaruar kontrata në përfundim të edicionit dhe klubi nuk e ka konfirmuar ende, “sytë” janë të gjithë nga pankina. Ka qenë vetë presidenti i klubit, Arben Laze, që një ditë më parë për “Panorama Sport” konfirmoi vetëm drejtorin teknik, Sabri Dalipin, ndërsa të tjerët janë ende në diskutim.
Megjithatë, burime të besueshme në klub pohojnë se aktualisht tre janë emrat që po lakohen për trajner të Elbasanit: Lleshanaku mbetet favorit, por këtë pozicion mund ta marrë edhe ndihmësi i tij, Mikel Cenaj, si edhe trajneri i të rinjve, Arjan Kila.
LLESHANAKU – Sezonin që sapo lamë pas, shumë pak besonin te qëndrimi i Elbasanit në kategori, por nën drejtimin e Shkëlqim Lleshanakut, verdheblutë ia dolën që në fund të siguronin mbijetesën. Për këtë arsye, ai mbetet favoriti. Shanset që ai të rinovojë edhe për sezonin e ardhshëm janë në masën 45 për qind.
CENAJ – Mikel Cenaj ishte ndihmësi i Lleshanakut pas rinisjes së kampionatit dhe pikërisht kthesa e skuadrës erdhi pas emërimit të tij në këtë pozicion. Një pjesë e rëndësishme e realizimit të objektivit i shkon Cenajt, ndaj shanset që ai të marrë “timonin” e verdhebluve janë rritur ndjeshëm. Cenaj ka 30 për qind të mundësive për sezonin e ardhshëm që të marrë frenat e ekipit në dorë.
KILA – Një emër që është përfolur gjithnjë këto kohët e fundit është edhe ai i trajnerit të të rinjve, Arjan Kila. Pas disa viteve eksperiencë në ekipin e të rinjve, duket se ka ardhur momenti i duhur t’i besohet një pozicion edhe në ekipin e parë. Ka marrë të gjitha kualifikimet e duhura, por shanset në krahasim me Lleshanakun dhe Cenajn janë më të pakta, me rreth 15 për qind të mundësive të drejtojë këtë sezon ekipin e parë.
TË TJERËT – Përpos këtyre tre emrave, janë edhe 10 për qind të shanseve që në drejtimin e klubit të vijë dikush tjetër, gjithnjë bëhet fjalë për një trajner brenda familjes dhe që aktualisht është pjesë e ekipeve të moshave.
VLADIMIR MEMA
NDIQE LIVE "PANORAMA TV"