Trajneri i Luftëtarit beson te kthesa kundër Devollit: Me Flamurtarin na penalizoi fusha, lutemi të mos bjerë shi…
Në Gjirokastër janë të zhgënjyer për mënyrën se si kanë shkuar gjërat në këto nëntë javë kampionat në grupin B të Kategorisë së Dytë. Me 12 pikë dhe të pozicionuar në vendin e gjashtë, te AF Luftëtari mendojnë se me lojën që kanë zhvilluar, tashmë duhet të kishin edhe të paktën 5-6 pikë më tepër, për të qenë afër Flamurtarit kryesues.
Gjithsesi, drejtuesit bluzi besojnë shumë se situata do të ndryshojë për mirë. Klubi gjirokastrit është bazuar te një grup lojtarësh 90% vendës, të cilët morën përsipër të përfaqësonin skuadrën e zemrës edhe në Kategorinë e Tretë, pak muaj pas shkrirjes së KF Luftëtarit.
Pas humbjes minimale ndaj Flamurtarit në Gjirokastër, ku u luajt në një fushë të mbushur me ujë, të dielën në 13:30 bluzinjtë luajnë sërish në shtëpi, këtë herë kundër Devollit, që aktualisht mban vendin e dytë.
PETRAQ MEÇI
“Asnjë rezultat tjetër nuk na hyn në punë, veç fitores përballë Devollit”. Kështu e nis prononcimin e tij për “Panorama Sport” trajneri i AF Luftëtarit, Petraq Meçi. Pas një karriere të suksesshme nën drejtimin e grupmoshave të klubit gjirokastrit, 36-vjeçari mori përsipër këtë sezon të drejtojë ekipin e parë, nën “bekimin” e të ndjerit Mustafa Hysi.
“Kemi punuar me seriozitet për këtë takim dhe e rëndësishme është që grupin e futbollistëve do ta kem të plotë. I përgëzoj lojtarët për punën e bërë gjatë këtyre ditëve, të cilat kanë qenë jo pak të vështira sa i përket motit, që është shoqëruar me reshje të dendura shiu.
Skuadra ime luan një futboll me topin poshtë dhe është shumë e rëndësishme që fusha të jetë në gjendje optimale. Përballë Devollit duhet të vëmë zemrën në fushë, pasi jam i bindur që do të fitojmë. Futbollistët janë të motivuar për të kërkuar tri pikët e plota pas asaj humbjeje të pamerituar ndaj Flamurtarit.
Luajmë në shtëpi dhe kjo na favorizon, por mbetemi me shpresë që të dielën të jetë një mot më i mirë dhe jo si në ndeshjen ndaj vlonjatëve. Kemi edhe një ditë kohë për të piketuar 11-shin që do të hedhim në fushë. Përtej gjithçkaje, fitorja do të thotë më shumë besim, më shumë siguri për të synuar ngjitjen në klasifikim”, përfundoi trajneri Meçi.
TOMOR SHEHU – PANORAMASPORT.AL
NDIQE LIVE "PANORAMA TV"
