Trajneri i Egnatias tregon momentin e vështirë: Përfundova në spital para ndeshjes
Pas tri javësh kampionat që janë luajtur deri tani, Egnatia ka arritur të renditet me meritë në krye të Grupit B. I vetmi moment që prishi disi bukurinë e sfidës me Lushnjën, ishte problemi shëndetësor i trajnerit Vladimir Gjonaj. Pas mbërritjes në stadium, trajneri nuk u ndje mirë dhe kërkoi ndihmën e stafit mjekësor të skuadrës dhe më pas u transportua për në spital. Pasi mori mjekimin e nevojshëm, trajneri u transferua në hotelin ku qëndron duke mos u lejuar të shkojë në stadium.
Në lidhje me atë moment të vështirë, Gjonaj thotë: “Tashmë pas kryerjes së vizitave mjekësore në spitalin e Rrogozhinës dhe marrjes së mjekimeve, jam më mirë. Kalova një moment që nuk dua ta kujtoj më, pasi e kam hedhur pas krahëve gjithçka. I falënderoj të pranishmit që më dhanë ndihmën e parë gjatë situatës që u krijua pak çaste nga fillimi i sfidës.
Do të doja shumë të isha në drejtim, por ndodhin edhe gjëra që nuk priten. Por, me sa mora kontakte të vazhdueshme me stafin, grupi ishte paraqitur mirë pavarësisht se goli u kishte munguar. Pavarësisht rezultatit jemi përsëri në krye të renditjes aty ku Egnatia e meriton të jetë gjatë”, tha Gjonaj.
Aldo Buzi
NDIQE LIVE "PANORAMA TV"