Nuk është e para herë që Tirana tregon se nuk është vetëm një ekip futbolli. Të shumta kanë qenë rastet kur lojtarët bardheblu janë bërë pjesë e kauzave madhore, duke dhënë kontribut. Dhe sigurisht që nuk mund të linin në harresë edhe fëmijët autikë në ditën ndërkombëtare të autizmit. Një përfaqësi e klubit bardheblu, gjatë paradites së 2 marsit, u ka kushtuar afro 60 minuta fëmijëve të qendrës “Tiss”. Erando Karabeci, Gentjan Muça, Gjergji Muzaka, Grent Halili dhe Majkëll Peçi, në emër të të gjithë familjes bardheblu, kanë ndarë disa pako me dhurata, shumë buzëqeshje dhe fotografi për fëmijët në ditën e tyre. Nën moton “Mos i injoro shenjat e autizmit, zbuloje herët”, KF Tirana ka përcjellë një mesazh sensibilizimi. Megjithatë, klubi nuk e ka lënë me kaq. Të gjitha biletat që do të shihet për ndeshjen Tirana-Tërbuni do të shkojnë në formë donacioni për fëmijët autikë. Në “Facebook”, klubi ka publikuar çmimet, ndërsa ka ftuar që të gjithë tifozët që të mos mungojnë në shkallët e stadiumit, pasi të gjitha paratë që do të grumbullohen këtë herë do të shkojnë për një kauzë realisht humane. “Në kuadër të ditës ndërkombëtare të autizmit, klubi ka vendosur të dhurojë të gjitha të ardhurat që do të grumbullohen nga shitja e biletave për Tirana-Tërbuni. Ftojmë të gjithë tifozët bardheblu që të mbështesin ekipin, si dhe të kontribuojnë për një kauze humane”, shkruante klubi. Reagimi i “Fanatics” – Bojkoti vazhdon. Madje këtë lajm e konfirmon vetë “Tirona Fanatics”, teksa me një postim sqaron se nuk do të jenë në stadium, por ndërkohë ata do të mbledhin fonde veçmas për t’u sensibilizuar. “‘Tirona Fanatics’ solidarizohen me ditën ndërkombëtare të ndërgjegjësimit për autizmin. Sot (dje) dhe nesër (sot), te ‘Bar City Firm’ është hapur arka për mbledhjen e ndihmave që do të dhurohen për fëmijët autikë. Nesër (sot) ‘Tirona Fanatics’ nuk do të jenë në stadium, por në mënyrë të pavarur do t’i përkushtohen kësaj nisme. Ndihmo, bashkë me ‘Fanatics’ fëmijët autikë!”, shkruante grupimi në “Facebook”.

NDIQE LIVE "PANORAMA TV"

---