Tirana dështon me trajnerin e ri, katastrofë në startin e Ligës Ballkanike
Tirana e ka nisur me disfatë aventurën e saj në Ligën Ballkanike, në basketboll për meshkuj, ku u mund thellë dje në mbrëmje nga maqedonasit e Blokotehnas, me rezultatin 100-68 në transfertën e Gevgelijas. As trajneri i ri, greku Antonios Dukas, apo blerjet e “bujshme” në merkato nuk mjaftuan për bardheblutë, për të evituar këtë humbje që në start.
Klubi e prezantoi trajnerin si shpëtimtar për sezonin e ri sportiv, por transferta fqinje rezervoi të kundërtën. Tirana ka qenë anonime përballë të zotëve të shtëpisë që e zgjidhën ndeshjen që në periodën e parë. Dukas i beson pesëshes titullare: Shima, Hysenagolli dhe tre përforcimet e fundit Vladimir Brçkov, Svetozar Popoviç dhe Xhalil Abdul-Basi.
Pas një fillimi të ekuilibruar, ekipi i Blokotehnas nuk humb kohë dhe shkë- putet në mesin e periodës së parë, 13-9, 18-11, 20-14. Vendësit kanë gjithçka nën kontroll duke përfituar edhe nga gabimet e bardhebluve. Kështu perioda e parë mbyllet me fitoren e maqedonasve 24-16.
Me rikthimin në parket, Tirana ndryshon disi në lojën e saj dhe ngushton shifrat në -6 pikë, pas dy gjuajtjeve të lira të Hysenagollit. Por ky sulm zgjat shumë pak për Tiranën që më pas lë shumë hapësira në mbrojtje dhe lojtarët e Blokotehnas rikthejnë avantazhin në +12 pikë pas koshit të Mladenovikj. Tekniku Dukas sinjalizon për “time out” për të shkundur të tijtë, të cilët janë totalisht jashtë loje.
Por, as kjo frymëmarrje nuk shërben, pasi skuadra e tij, edhe pas rikthimit në parket,l është inekzistente. Maqedonasit fitojnë edhe më tepër terren deri në 48- 32 (diferenca më e thellë për momentin). Shumë gabime në sulm nga Tirana, Blokotehna shkon në pushimin e ndeshjes nën epërsinë 54-34, ndërsa e fitoi këtë periodë 30-20. Më pas ndeshja kthehet më tepër në një seancë stërvitore për vendësit përballë një kundërshtari totalisht të shpartalluar 64-38.
Blokotehna krijon një avantazh të pjesshëm të frikshëm 29-9 dhe ai total 84-45. Kështu, perioda e tretë nuk ka histori që përfundon 30-9 në favor të Blokotehnas. Ndërsa verdiktet ishin dhënë me kohë, në periodën e katërt skuadra maqedonase e ul ritmin e lojës dhe e sheh veten në disavantazh të pjesshëm 0-10, falë kontributit të trios Lasku-Shima-Hysenagolli.
Me gjithë presingun e Tiranës, për kundërshtarin nuk ka vend për panik, pasi administrojnë me qetësi ndeshjen 93-61. Tirana është superiore në këtë pjesë loje, por që është kujtuar vonë pasi koha është e pamjaftueshme për të besuar te mrekullia e një përmbysjeje të mundshme.
Dy pikët e shënuara nga gjuajtjet e lira, nga amerikani Duejn Benjamin kapin kuotën 100 për Blokotehnan. Tirana e fiton periodën e katërt 23-16 që vlejti veçse për statistikë. Më i miri për Tiranën dhe gjithë ndeshjen ishte Endrit Hysenagolli. Qendra kryeqytetase kontribuoi me 33 pikë dhe 7 topa në tabelë, ndërsa Gerti Shima shërbeu me 11 pikë dhe 5 asiste.
Nga kampi vendës, Benjamin regjistroi 25 pikë dhe 9 topa në tabelë, ndërsa Goran Glavçev i shtoi 21 pikë dhe Marjan Mladenovikj 15 pikë dhe 5 asiste.
OLGERT SERANI
NDIQE LIVE "PANORAMA TV"