Teuta merr formë, Magani pret Sundayn dhe një… “bomber”
Skuadra e drejtuar nga Gugash Magani dita-ditës po bëhet gati për startin. Afrimet e fundit po u japin tjetër pamje durrsakëve, të cilët sezonin e ri kanë pretendime realisht madhore. Projekti i drejtuesve më të lartë të klubit është realisht ambicioz, ndërsa synojnë një vend në Kupat e Europës. E, megjithatë, për të qenë në top-formë, priten të tjera blerje dhe kryesisht në sulm.
Ky repart ka ende nevojë për ndërhyrje, ndaj krerët më të lartë të “djemve të detit” po operojnë për të bërë goditjen e fundit, pasi kanë siguruar shërbimet e Onyeka Osemene dhe Latif Amadu janë afruar. Mendohet që deri të hënën skuadra të jetë kompletuar. Klubi ka hartuar një merkato që duhet vlerësuar për blerjet e bëra, gjë që është dëshmuar edhe prej paraqitjeve në ndeshjet miqësore.
Peqinasi i Teutës ka më tepër mundësi zgjedhjeje për këtë sezon. Janë afruar lojtarë, të cilët kanë pothuajse të njëjtin nivel teknik, por dhe përgatitje fizike. Kështu dhe konkurrenca është më e madhe në skuadër dhe opsionet janë më të shumta. Me rikthimin e Shpëtim Moçkës porta blindohet, ndërsa duhet thënë që për këtë sektor janë gati edhe 3 të tjerë, konkretisht: Kastrati, Vata dhe i riu Shala.
Në kësi kushtesh, mund të ketë edhe ndonjë rrjedhje. Sakaq, në ditët në vijim, pritet të mbërrijë edhe mbrojtësi Sunday, i cili ka pothuajse një muaj që përflitet si një prej afrimeve, por ende nuk ka shkelur në Durrës.
JETON REXHMATI
NDIQE LIVE "PANORAMA TV"