Ndeshja e djeshme në Laç u luajt nën masa të rrepta për sa i përket rendit. Qindra forca policore, “Renea” dhe “FNSH” ishin angazhuar për mbarëvajtjen e sfidës së djeshme që ishte e para për turin gjysmëfinal të Kupës së Shqipërisë. Gazeta sjell disa prej momenteve pikante gjatë takimit.

-Rreth 1500 tifozë ndoqën ndeshjen e djeshme, ndërsa hyrja ishte e lirë. Qindra forca policore ishin angazhuar për mbarëvajtjen e këtij takimi.

-Ka mjaftuar një përplasje mes Musollit dhe Shtubinës në minutën e 40-të, afër vijës anësore që tifozët e Laçit të shpërthejnë duke hedhur shishe me ujë dhe sende të tjera në drejtim të lojtarëve të Kukësit. Një moment tensioni që shuhet brenda pak sekondash. Gjyqtari Koçi i ndëshkon të dy lojtarët me kartonë të verdhë.

-Gjatë ndeshjes, tifozët vendës hodhën në 2-3 raste flakadanë në fushë, gjë që rrezikojnë dënim nga Komisioni i Disiplinës pranë FSHFsë.

-Takimi i djeshëm u ndoq nga Kombëtarja U-15 që këto ditë është grumbulluar nga trajneri Eqerem Memushi. Kuqezinjtë e vegjël ishin të vendosur në një prej tribunave të stadiumit.

-Në këtë takim, Kukësi nuk pati mbështetjen e tifozëve, pasi kuksianët prej disa ditësh janë zhvendosur në Tiranë në protestë për lirimin e 23 të arrestuarve pas protestave në Rrugën e Kombit.

-Në goditjen e fundit standarde në minutat shtesë, Uzuni puthi topin përpara goditjes, por as ky gjest nuk e ndihmoi që Laçi të shënonte. -Presidenti bardhezi, Pashk Laska, dje nuk lëvizi thuajse asnjëherë nga vendi i tij në zonën “VIP”.

-Njëri nga personat në kërkim për ngjarjet e fundit në Kalimash u pa dje në tribunën e Laçit. “Ata më kërkojnë, por unë ju kam thënë se gjendem në shtëpi. Sepse nuk kam asnjë lidhje me trazirat”, u shpreh mes miqsh dje njëri nga njerëzit e afërt të stafit kuksian.

NDIQE LIVE "PANORAMA TV"

---