Talenti i Ajaksit snobon kuqezinjtë: Milani një klub në kaos, preferoj Interin
Frenki de Jong është vetëm lojtari i radhës i dalë nga shkolla e Ajaksit që po shkëlqen: vetëm 21 vjeç, por si çdo talent i akademisë kuqeblu duket gati për hapin e madh. Megjithatë, Milani nuk duket të jetë në të ardhmen e Frenkit. Talenti i klubit rekordmen të Holandës, në fakt, ka komentuar kuqezinjtë me fjalë vërtet të rënda:
“Nuk do më pëlqente të shkoja te Milani sepse nuk po luan mirë dhe klubi po kalon një periudhë kaosi”. I duket më mirë Interi: “Një skuadër interesante, – është shprehur mesfushori në një intervistë për holandezen “Voetbal”.
LUAN KUDO – Emri i tij po bën bujë, por shumë pak e njohin për stilin e lojës. Një lojtar i talentuar dhe unik, në një moshë aq të re, zotëron karakteristika dhe besimin e kampionëve, por mbi të gjitha bie në sy për thjeshtësinë me të cilën ndryshon pozicion në fushë (cilësi jo e rrallë për një holandez, që është rritur duke parë “futbollin total” të kombëtares së tij).
Vendoseni në cilindo vend të fushës, pak rëndësi ka nëse është repart sulmues apo mbrojtës, e do mbeteni të habitur nga mënyra si do përshtatet. Deri tani, De Jong ka luajtur në gjithë mesfushën dhe mbrojtjen për Ajaksin.
Për statistikë, janë plot 5 pozicionet e mbuluara vetëm këtë edicion të “Eredivise”: qendërmbrojtës, mbrojtës i djathtë, mesfushor-mbrojtës, mesfushor i majtë dhe i djathtë. Parapëlqen, por vetëm për lehtësim, krahun e majtë (sepse përdor këmbën e majtë). Sezonin e fundit, 21-vjeçari ka preferuar dy sisteme mbi të gjithë: 4-2-3-1 (skema e preferuar e Luçiano Spaletit tek Interi) dhe 4-3-3 (moduli “tradicional” i Gatuzos), si për të “thënë” që komenti mbi skuadrat milaneze nuk ka të bëjë me zgjedhjet taktike të dy skuadrave.
“SINJAL” BARÇËS – Futbollisti me vitlindje 1997 ka një vlerë prej 40 milionë eurosh dhe aktualisht po ndiqet nga gjithë klubet e mëdha të Europës. Nuk do jetë, megjithatë, e lehtë t’i merret Ajaksit, që e ka blinduar deri në 2022-shin. Në garë është edhe Barcelona dhe numri 21 e pasqyron veten pikërisht te katalanasit: “Shoh video në ‘YouTube’ në përpjekje për të mësuar diçka nga Ksavi e Iniesta. Mesi? Argëtohem duke e parë, bën gjëra fantastike që herë-herë më duken të pamundura”.
Përgatiti: LEDIO NASE
NDIQE LIVE "PANORAMA TV"