Pas dy muaj larg stadiumeve, Partizani pritet që të ketë mbështetjen e tifozëve të zjarrtë “Ultras Guerrils”, në ndeshjen e së hënës ndaj Kukësit, takim i cili do të luhet në orën 18:00, në stadiumin “Selman Stërmasi”.

Së fundmi, janë zhvilluar disa takime trepalëshe, (polici, tifozë dhe klub) ku është gjetur dakordësia që ultrasit të jenë prezentë në stadium, në mbështetje të skuadrës.

Ultrasit e kuq e bojkotuan ardhjen në stadium, kryesisht në kryeqytet në ndeshjet brenda të Partizanit, për shkak të kushtit të vendosur nga Policia e Tiranës, e cila nuk lejonte tifozët të hynin pa shfaqur kartën e identitetit.

Ultrasit e kuq nuk e pranuan këtë kusht dhe para ndeshjes me Laçin bënë thirrje që braktisja e tifozëve të jetë totale. Në këtë takim, ku të pranishëm ishin 400-500 vetë, drejtuesit e klubit e kuptuan se sa e rëndë- sishme është prania e tifozëve, pasi nëse ekipi do të kishte mbështetjen e tyre, mund t’ia kishin dalë për të marrë një rezultat më të mirë.

Ndaj, në ditët e fundit u intensifikuan bisedimet me policinë e kryeqytetit. Në takime kanë qenë prezent përfaqësues të klubit, përfaqësues të grupimit “Ultras Guerrils”, si dhe zyrtarë të lartë të Policisë.

Pas diskutimeve dhe modeleve të paraqitura nga palët, është plotësuar kushti i ultrasve, në mënyrë që të ruhet parimi i tyre i mosidentifikimit: “no name, no face”. Mes varianteve të diskutuara dhe shqyrtuara, ka qenë që hyrja pa karta në stadium, të ishte e vlefshme vetëm për grupimin ultras, ndërsa me të tjerët të vijohej proceduara.

Por, edhe kështu ata do të identifikoheshin, pasi duke mos paraqitur mjetin e identifikimit, pozicionoheshin direkt. Në përfundim të diskutimeve është gjetur gjuha e përbashkët, që hyrja e tifozëve në stadium, kryesisht në “Selman Stërmasi”, të jetë vetëm me biletën e ndeshjes.

Gjithsesi, të gjithë do të kontrollohen sipas rregullave për të evituar futjen e mjeteve të ndaluara në stadium, por nuk do të kërkohet karta e identitetit. Ndeshja me Kukësin shikohet si prova e së vërtetës së kësaj marrëveshjeje, ndonëse te tifozët ekziston skepticizmi, pasi mund të përballen në hyrje të stadiumit, me kërkesën për paraqitjen e mjetit të identifikimit.

NDIQE LIVE "PANORAMA TV"

---