Është rikthyer kampi onati i basketbollit të femrave me ndeshjen e Grupit A, Studenti-Skënderbeu, e luajtur dje pasdite në pallatin e sportit “Asllan Rusi” në kuadër të javës së pestë të kampionatit kombëtar për femra.

Pas një ndërprerje 10-ditore, për shkak të dy ndeshjeve të para të ekipit tonë kombëtar që zhvilloi për kualifikimet e Europianit 2019, ku skuadra jonë kombëtare ka dështuar në të dyja këto takimet të para të luajtura në Tiranës ndaj Rusisë, ku humbëm 37-122 dhe në Budapest me kombëtaren e Hungarisë, 48-137.

Tashmë gjithçka është lënë pas dhe skuadrat kanë dalë përsëri në parket për ndeshjet e kampionatit. Në ndeshjen e luajtur në Tiranë, skuadra e Studentit ka triumfuar në tri perioda, por është surprizuar në periodën e dytë. Skuadra që drejtohet nga Florentina Mitku ka qenë absolute në periodën e parë, ku Metani e Mema kanë shkëlqyer në pikët e shënuara.

Këto, të organizuara nga kapitenia Aida Vata, kanë udhëhequr vazhdimisht duke e mbyllur periodën e parë 31-10 dhe u duk sikur çdo gjë mori fund. Por, nuk ndodhi kështu, pasi skuadra korçare e drejtuar nga Bruno Topi i është kundërpërgjigjur me një fitore 22-11 duke vënë në dilemë fitoren e skuadrës së Studentit, pasi diferenca në mesin e kësaj periode ngushtohet në deri 3 pikë dhe ka panik në radhët e studenteve.

Megjithatë, skuadrat shkojnë në pushimin mes dy pjesëve me një diferencë prej 10 pikësh 42-32. Në fraksionin e dytë skuadra e Studentit nuk toleron më dhe ka vlerësuar realisht kundërshtarin. Ato arrijnë të mbyllin periodën e tretë me 10 pikë diferencë duke e thelluar diferencën e përgjithshme me 20 pikë përpara dhe në periodën e fundit janë treguar të pamëshirshme duke shënuar 27 pikë, ndërkohë mikeshat korçare arrijnë të shënojnë vetëm 3 pikë.

Kështu takimi mbyllet 92-49 (43 pikë diferencë). Pikët më të shumta i realizuan, Metani e Mema nga 25 pikë dhe Vata 21 pikë. Kështu sot do të luhen takimet e tjera, ku si kryendeshje pritet të jetë ajo mes Flamurtarit dhe Tiranës, e cila do të luhet në Vlorë. Ndërkohë që të dielën në Durrës, Goga Basket do të presë Vllazninë.

GRUPI B

Ndeshja tjetër ishte planifikuar ajo e luajtur në Kamzë për grupin B, ndërmjet Kamzës dhe Elbasanit, ku mikeshat nga Elbasani kanë fituar në këtë transfertë bindshëm me 31 pikë diferencë. Fillimisht, është skuadra e Elbasanit ajo që shfaqet bindshëm duke e mbyllur periodën e parë 23-2. Janë Dervishaj, Hasa e Kasa ato që bëjnë diferencën.

Ndërsa në periodën e dytë skuadra e Kamzës rifutet në lojë dhe rivalizon pothuajse në përmasat e një rivali duke e mbyllur me fitore këtë periodë 18-11, ku janë dalluar Oruçi, Prençi, Bezati e Uka. Kështu që skuadrat do të shkojnë në pushimin mes dy pjesëve me një diferencë prej 28 pikësh (13-41). Në fraksionin e dytë është përsëri skuadra mike nga Elbasani që kërkon të vulosë fitoren dhe ia ka arritur qëllimit, teksa ka triumfuar në periodën e tretë 13-18.

Në periodën e fundit është skuadra e Kamzës që mundohet të ngushtojë diferencat e pikëve, edhe pse e ka fituar këtë periodë të fundit ajo nuk ka mundur dot të përmbysë rezultatin.

Në këtë grup, sot do të luhet ndeshja tjetër mes skuadrave të Apolonisë dhe Partizanit, ku nuk pritet ndonjë surprizë, ndeshje që do të luhet në orën 14:00. Ekipet e meshkujve do të jenë këtë javë pushim, për shkak të ndeshjeve të ekipit tonë kombëtar që do të zhvillojë me datë 23 nëntor, në orën 17:30, kundër Armenisë në palestrën sportive të Olimpik Park “Feti Borova”.

ABDULLA DUSHKU

NDIQE LIVE "PANORAMA TV"

---