Tri skuadra që po luftojnë për çdo pikë dhe dy vende në dispozicion për të marrë pjesë në Champions-in e sezonit të ardhshëm. Një garë entuziazmuese që sheh të përfshira Romën, Lacion e Interin, gati të nisin një betejë në katër javët e fundit të kampionatit për të prerë “biletën” e pjesëmarrjes në kompeticionin kryesor europian për klube.

Pavarësisht dy fitoreve radhazi kundër Kaljarit e Kievos, në këtë moment jashtë Champions-it mbeten zikaltrit, të pestët në klasifikim në kuotën 66 pikë, një më pak se dy rivalet. Për Ikardin me shokë, që në ndeshjen e fundit do përballen pikërisht me Lacion, në javën e ardhshme të kampionatit vjen sfida kundër Juventusit, e gjymtuar nga humbja në ndeshjen direkte për titull ndaj Napolit. Një takim që mund të rezultojë vendimtar për vijimësinë e sezonit.

Këtë e di mirë Luçiano Spaleti, që me rastin e takimit mes arbitrave, trajnerëve e kapitenëve të klubeve të Serisë A të zhvilluar në selinë e Komitetit Olimpik Kombëtar Italian, ka folur për momentin e skuadrës, duke u ndalur fillimisht te përfundimet e seminarit: “Janë gjithmonë interesantë e produktivë, na japin zgjidhje të reja.

Gjithçka kuptohet edhe në fushë, por këtu hyjmë në detaje sepse njohuritë janë të pakta dhe është e mira të thellohesh për të evituar kritikat pa sens. Rezultatet? Na shfaqën disa të dhënë, nga të cilat del në hap një qetësi më e madhe: ka shumë më pak të ndëshkuar me karton të kuq e më pak protesta e simulime; janë arritur objektivë shumë të rëndësishëm”.

LUFTË E BUKUR – A ndikon kalendari në këtë fazë finale? Ja si e mendon trajneri zikaltër: “Nuk ndikon aspak, ne duhet të kemi personalitetin për të luftuar së bashku me këtë ‘pasiguri’. Sepse edhe tifozët (e jo vetëm) që e kanë këtë cilësi dhe presin me adrenalinën maksimum: pikërisht nga suspanca, nga lufta e ngushtë. Shpresoj prej tyre (tifozëve) që të na japin një shtysë të rëndësishme: të vijnë në stadium për na mbështetur, e jo për të bërë tifozëri anti-Juve. Për Champions-in, thelbësore do jenë karakteri e personaliteti”.

TITULLI, JUVJA E SARRI – Diçka për Juventusin, që Interi e pret të shtunën, ka ndryshuar, megjithatë, pas humbjes të dielën…: “Nëse doni Sarrin e Alegrin ndoshta një ditë i ftoj për darkë e ndoshta mësoj diç- ka sepse janë dy trajnerë e njerëz, që e dinë shumë mirë punën e tyre, do dinë të menaxhojnë mirë edhe këtë fazë finale të kampionatit. Roma e Lacio, të avantazhuara për Champions-in? Për momentin kanë një pikë më shumë në klasifikim më shumë se ne dhe kjo është diçka e madhe”. Gjeste si ai i Sarrit të dielën (gishti i mesit), a duhen evituar? “Kam përshtypjen se Mauricio e shpjegoi në mënyrë korrekte, vendosuni edhe në vendin e të tjerëve…”.

Përgatiti: LEDIO NASE

NDIQE LIVE "PANORAMA TV"

---