Solidarizimi, biletat e “derbit” të Kategorisë së Parë do shkojnë për të prekurit e tërmetit
Lushnja solidarizohet me të prekurit e tërmetit të 26 nëntorit. Dhe duhet thënë që kanë gjetur ndeshjen e duhur, pasi këtë fundjavë do të matin forcat me Apoloninë dhe stadiumi pritet të tejmbushet.
“KF Lushnja për ndeshjen me Apoloninë ka vendosur në bashkëpunim me bashkinë dhe tifogrupin ‘Delegatët’ që të gjitha të ardhurat nga shitja e biletave të shkojnë në ndihmë të të prekurve nga tërmeti i 26 nëntorit”, thuhet në deklaratën e sekretarit Edison Koçi. Sakaq, ekipi po vijon përgatitjet interesave për “derbin” myzeqar. Verdhejeshilët kanë 19 pikë dhe ndodhen në vendin e tretë, ndaj do të tentojnë vetëm fitoren për të parakaluar rivalin historik që është i dyti. Një përballje e zjarrtë pritet të shtunën në orën 13:00 në “Roza Haxhiu”.
Ilir Gjyla duhet t’i bëjë llogaritë edhe me dëmtimet para këtij 90-minutëshi delikat. Veç kapitenit Sefa që mungon prej një kohe të gjatë, janë Mone, Alushi, E.Gjyla dhe Ruço që shqetësojnë. Trajneri shpreson te rikuperimi i tyre, ndonëse lajmet e para të mira vijnë nga mbrojtësi i krahut të majtë, Ledion Ruço. Ky i fundit për “Panorama Sport” konfirmon se gjendja e tij po vjen drejt përmirësimit. “Kisha një kontraktim muskulor. Në shpejtësi kisha probleme dhe nuk startoja dot. Pushimi i bëri mirë. Kam dalë në stërvitje, që nga e hëna dhe nuk kam pasur dhimbje. Ka kohë deri të shtunën, por besoj që do të jem i gatshëm. Është e kuptueshme, që për Lushnjën është një ndeshje shumë e rëndësishme dhe shpresoj që të jemi në lartësinë e ndeshjes”, është shprehur mbrojtësi.
Alban Alushi
NDIQE LIVE "PANORAMA TV"