Nëse ka një klub që ka provuar gjithçka në futbollin shqiptar, pa frikë mund të thuhet se është Elbasani. Një ekip që ka prekur majën dhe fundin, nga fitues i kampionatit dhe Kupës së Shqipërisë e deri në Kategorinë e Dytë. Megjithatë, në dekadën e fundit statistikat nuk kanë vend për krenari. Misioni i vetëm që kanë pasur, ishte një: mbijetesa.

“Panorama Sport” u bën një “skaner” verdhebluve të këtij 10- vjeçari, nivelin ku ka luajtur dhe pozicionin që ka zënë në renditje. Ajo që bie në sy se dominon prezenca në Kategorinë e Parë dhe fundi i tabelës. Dy herë kanë dalë kampionë këto dhjetë vitet e fundit, në sezonin 2013-2014, ku militonin në të Parën, duke siguruar kështu ngjitjen në Superiore dhe në sezonin 2017-2018 në të Dytën, ku u ringjitën në Kategorinë e Parë. Sakaq, sa u përket tetë sezoneve të tjera, kanë qenë për t’u harruar, me pozicione pa “vlerë” në klasifikim.

SEZONI AKTUAL – Për sezonin aktual ende nuk mund të flitet se çfarë Elbasani do të shohim në fushë, por gjasat janë që të jetë po i njëjti klub i këtyre 10 viteve të fundit, me objektivat që nuk duken madhorë. Kjo, e lidhur me ndërhyrjet që janë bërë në merkato, ku kryesisht kanë ruajtur ekipin i cili vitin e kaluar me shumë vështirësi ia doli të mbijetonte në të Parën dhe kanë munguar afrimet me lojtarë “big”. Megjithatë, nëse e krahasojmë me pesë sezonet e fundit që kanë milituar në Kategorinë e Parë (një herë në të Dytën), në letër duket një skuadër tjetër, edhe pse jo aty ku të gjithë shpresojnë. Ky sezon do të jetë i pesti radhazi për verdheblutë që nuk do të luajnë në Superiore, si asnjëherë më parë në historinë e vet 100-vjeçare. Mjafton vetëm ky fakt për të treguar edhe situatën në të cilën ndodhet ky klub futbolli, me dekadën e fundit që mund të konsiderohet si ndër më të errëtat e saj.

VLADIMIR MEMA-PANORAMASPORT.AL

NDIQE LIVE "PANORAMA TV"

---