Ardhur me shumë bujë, por kanë krijuar një situatë kaotike dhe të paqartë brenda klubit fierak. Bëhet fjalë për stafin teknik italian të Apolonisë: kryetrajneri Manuele Blazi, zv.trajnerët Fabricio Antonini dhe Dario Dian, si dhe Daniele Deli Karri, emëruar së fundi drejtor i përgjithshëm, njëherësh dhe drejtor i akademisë së klubit fierak.

“Kuarteti” italian është larguar qysh të premten drejt shtetit të tyre, me justifikim objektivin e negocimit me dy futbollistë italianë (një mesfushor dhe një sulmues, që janë aktivizuar gjer në Serinë C), për t’i bërë pjesë të Apolonisë për sezonin e ri. Por italianët kanë krijuar jo pak hije dyshimi për situatën e tyre. Ata kishin një biletë vajtje-ardhje dhe duhet të kishin mbërritur në Shqipëri paraditen e kësaj të hëne, gjë që nuk ka ndodhur.

Nga burimet tona pranë klubit fierak, 4 italianët e stafit të Apolonisë nuk kanë informuar në klub për arsyen e moskthimit të tyre kësaj të hëne, por thjesht kanë bërë me dije se nuk mund të fluturojnë dot drejt Shqipërisë dhe vetëm kaq, duke e lënë evazive dhe konfuze situatën, pa qenë e qartë nëse do të kthehen në ditët e mëvonshme apo kanë vendosur të largohen përfundimisht nga Apolonia, duke zgjedhur këtë mënyrë aspak normale.

SITUATA – Kujtojmë që kryetrajneri Manuele Blazi ka vetëm dy javë në drejtim të Apolonisë, bashkë me zëvendëstrajnerin e parë Fabricio Antonini. Të dy kanë drejtuar së bashku në të njëjtat pozicione edhe Hamrun Spartans në Maltë dhe Aja Napa në Ligën e Dytë në Qipro. Dario Dian është pjesë e stafit të Apolonisë që nga koha e drejtimit të Xhovani Kolelës, ndërsa Daniele Deli Karri është bërë pjesë e Apolonisë në janar të këtij viti, bashkë me ish-trajnerin Fabricio Kamarata.

Përtej problemeve me skandalet e basteve në Itali gjatë vitit 2015, Deli Karrit iu besua së pari detyra e drejtorit teknik tek Apolonia dhe këtë sezon u projektua si drejtor i përgjithshëm dhe drejtor i akademisë së klubit. Jo vetëm kaq, por Deli Karri ishte personi që fitoi besimin e plotë të krerëve të klubit fierak edhe për merkaton e skuadrës në tregun e huaj, sidomos për transferimin në Europë të Gjatës dhe Mihanës, ku dështoi me sukses.

Nuk është çudi që mosardhja kësaj të hëne e stafit italian në Shqipëri të jetë një “Arrivederci e in bocca al lupo” për klubin fierak. Për sa i përket Apolonisë, pas largimit të Blazit & CO të premten, skuadra ka mbetur pushim dy ditë dhe vetëm kësaj të hëne i është rikthyer stërvitjes, nën drejtimin e përgatitësit fizik, Nikolin Çoçlli, dhe trajnerit të portierëve, Bledar Vashaku.

BUJAR RAMA – PANORAMASPORT.AL

NDIQE LIVE "PANORAMA TV"

---