Shumë përmbysje e pak personalitet, ja ku duhet ndërhyrë te Milani
Janë dy problemet që prishën transfertën fiorentinase të Milanit. Jo domosdoshmërisht në rend rëndësie: vendimet arbitrale dhe qëndrimi ekipor. Ndoshta nuk duken shumë, por janë mjaftueshëm për të prishur humorin për një kohë të gjatë. Sa i përket arbitrit, si Paolo Maldini ashtu edhe trajneri Pioli folën qartë pas takimit me Fiorentinën duke përdorur terma si “gjëra të çuditshme” dhe “aspekte që shkojnë përtej mundësive tona”.
Drejtori teknik në fakt e thelloi dozën duke e cilësuar penalltinë e dhënë kundër si diçka që nuk e kishte hasur kurrë në karrierën e tij. Fjalë që kumbojnë edhe 72 orë pas ndeshjes, aq më tepër për shkak të faktit se Maldini nuk është nga ata drejtorë klubi që i jepet shpesh mediave. Ai nuk kishte pranuar të komentonte penalltinë në favor të Juves në Kupën e Italisë, por deklaratat e së shtunës tregojnë qartë se te Milani nervat janë të zbuluara dhe prirja për të duruar është gjithnjë e më e pakët.
VERIFIKIME – Teksa ankesa jo-zyrtare në adresë të Shoqatës italiane të arbitrave ka mbërritur, bëhet e ditur se Milani nuk do të ndjekë zyrtarisht çështjen e “këmishëve të zeza” e nuk do të dorëzojë asnjë në mënyrë zyrtare ndonjë dosje. Nervozizmi kuqezi më shumë se nga penalltia e dhënë kundër, ka ardhur si pasojë e shpjegimit të marrë pas ndeshjes nga vetë arbitri Kalvarese dhe asistentët në VAR.
Drejtuesit e garës kanë bërë të qartë se kanë ndjekur protokollin dhe dje vendimi i tyre është cilësuar si i rregullt nga eprorët, ndaj nuk do të ketë asnjë sanksion disiplinor nga arbitrave në Fiorentina – Milan sepse prekja e topit nga Romanjoli nuk është e qartë e për më tepër duhej që pas prekjes së milanistit sfera të ndryshonte drejtim, çka nuk ka ndodhur.
PERSONALITET – Askush te Milani nuk kërkon të fajësojë arbitrat për mungesën e fitores të shtunën mbrëma. Si drejtuesit, ashtu edhe trajneri janë të ndërgjegjshëm se rezultati nuk erdhi për shkak të keqmenaxhimit që ekipi i bëri ndeshjes, pasi shkoi në avantazh e sidomos pasi ishte edhe në epërsi numerike. Nga këtu forcohen dyshimet që Milani nuk ka ende përvojë, është shumë i ri në moshë e nuk ka personalitetin e duhur.
Kur rivali rrit presionin dhe kronometri nis të peshojë, kuqezinjtë shfaqin të gjitha mangësitë strukturore e mendore. Kush është në krye të klubit nuk mund të mos e ketë vënë re mungesën e kurajës dhe vullnetit për të marrë përgjegjësi nga ana e disa lojtarëve, teksa edhe rrëmuja bëhet shumë e dukshme në momentet e vështira. Përmbysjet e pësuar nga Interi, Juvja dhe Fiorentina vazhdojnë të kumbojnë, ndaj te Milani është koha e vendimeve për të shpëtuar atë që mbetet nga sezoni aktual.
/PANORAMASPORT.AL/
NDIQE LIVE "PANORAMA TV"