PSG është mësuar të hasë skuadra të mëdha në raundet me eliminim direkt të Ligës së Kampioneve.

Bajerni i Mynihut është vetëm kundërshtari i fundit i kalibrit më të lartë për kampionët e Francës në 1/8-at, ndërsa Mbape me shokë janë gjendur përballë Çelsit, Barcelonës, Realit, Junajtidit dhe Dortmundit në raundet e fundit të fazës së parë me eliminim direkt në Champions. Por le ta nisim në rend kronologjik.

Në vitin 2015, ekipi francez u përball me Çelsin në këtë fazë dhe arriti të kualifikohej pas dy barazimeve falë rregullit të golave në fushë kundërshtare.

Por në çerekfinale ata u mundën kundër Barcelonës 1-3 dhe 2-0. Në 2016-ën, Parisi u përball sërish kundër bluve të Londrës. Ata fituan 1-2 e 2-1 dhe u kualifikuan në çerekfinale, ku më pas u eliminuan nga Mançester Siti. Barcelona u përball me Parisin në 1/8-at në 2017.

Kishte 1% shans dhe 99% besim, por francezët u eliminuan pas golit të Serxhi Robertos në frymën e fundit të ndeshjes. Reali që fitoi Champions-in në 2018, ishte skuadra që mundi PSG-në në 1/ 8-at e atij sezoni. Në 2019-ën shorti i vendosi përballë Junajtidin.

Anglezët humbën 2-0 ndeshjen e parë, por në duelin e luajtur në “Parc des Princes” arritën ta përmbysin, duke fituar 3-1 dhe lënë francezët jashtë Champions-it. Në 2020-ën PSG-ja shkoi në finalen e parë të kompeticionit. Rruga e tyre nisi duke mundur Dortmundin në 1/8-at, Atalantën në çerekfinale, Lajpcigun në gjysmëfinale, por në Lisbonë u doli Bajerni dhe nuk e ngritën dot trofeun e parë historik.

Në 2021-shin Barcelona nuk ishte më ajo e dikurshmja në Europë dhe PSG-ja përfitoi nga dueli në 1/8-at për të avancuar më tej. Ata e vendosën praktikisht kualifikimin që në ndeshjen e parë, e cila i shtroi rrugën duelit me Bajernin në çerekfinale. Por ishte Siti i Guardiolës që preku finalen pasi eliminoi PSG-në.

Sezonin e shkuar, Reali i eliminoi francezët në 1/8-at pasi tre gola në 30 minuta u lejuan atyre të përmbysnin humbjen 1-0 të ndeshjes së parë.

Dhe tani vjen Bajerni, një prej skuadrave më të mira të kontinentit. Kampionët e Gjermanisë e mundën Barcelonën në dy ndeshjet e fazës së grupeve me rezultatin e përgjithshëm 5-0.

PANORAMASPORT.AL

NDIQE LIVE "PANORAMA TV"

---