Florijan Kadriu është një rikthim “big” tek Erzeni në prag të ndeshjes së sotme që do të luajë kundër Kukësit në orën 17:00 në stadiumin “Niko Dovana” të Durrësit.

Tetovari, edhe pse ka shënuar vetëm një gol e asistuar tri në 23 ndeshje, ka qenë ndër lojtarët kyç të ekipit shijakas këtë sezon, duke bërë mjaft mirë lojtarin ofensiv dhe difensiv në të dy krahët e fushës. Pas një lëndimi disa javor, ai duket se është i gatshëm të rikthehet ndaj Kukësit në një kohë ku Erzenit i duhen medoemos legjionarët.

Pak minuta i mori dhe Leao ndeshjen e fundit, i cili më parë vuante një lëndim në shpatull duke mos qenë i gatshëm për disa ndeshje. Pritet akoma më shumë kohë për rikthimin e treshes së famshme të qendrës Krasniqi, Sadiki, Enk së bashku me Asanin dhe Dukën, të cilët me shumë gjasa do të jenë të gatshëm ndaj Tiranës me 1 prill pas pushimit nga ndeshjet e kombëtareve. Ndërkohë, zëvendëstrajneri Alfred Deliallisi u shpreh se e vlerësojnë maksimalisht kundërshtarin e radhës, duke qenë që së fundmi gëzon një formë të mirë sportive, por nuk e konsideron të pakalueshëm. Stërvitjet janë zhvilluar me intensitet mjaft të lartë nga grupi i lojtarëve që janë të gatshëm dhe pritet që rezultati i kërkuar të jetë fitorja, duke hyrë në fushë për tri pikët para tifozërisë së zjarrtë shijakase, që po organizohen të shumtë dhe në këtë takim.

RONALD FAJA-PANORAMASPORT.AL

NDIQE LIVE "PANORAMA TV"

---