Presidenti i FSHF, Armand Duka, foli për “Supersport” para fillimit të ndeshjes me Turqinë në transfertë.

Duka tregoi se ndaj Turqisë konsiderohet si një finale, për faktin që Shqipëria kërkon të luajë çdo shans edhe pse minimal, ndërsa tregoi edhe dëshirën e Rejas kur fryu dje qirinjtë e tortës së ditëlindjes, si edhe siguroi se me Francën do inaugurohet stadiumi i ri Kombëtar.

E konsideroni finale ndaj Turqisë?

Çdo ndeshje e kombëtares ka rëndësi, po ashtu edhe kjo. Për ne, ekziston edhe një shpresë nëse marrim rezultat pozitiv sot. Edhe pse kualifikimi është shumë pak i mundshëm, duhet t’i luajmë të gjitha kartat në këtë atmosferë të zjarrtë. Më shumë ka turq, por edhe ato do i japin kurajo ekipit tonë.

Ndjeni keqardhje që eliminatoret i nisëm me Panuçin?

Edhe në ndeshjen e parë me Turqinë, ne krijuam raste. Nuk mund të them nëse do ishte Reja, do bënim ndryshe. Mbase po. Nëse do shfrytëzonim rastet, do ishte ndryshe. Tani Turqia kërkon të vulosë kualifikimin, ne kemi 9 pikë dhe kërkojmë shanset tona.

Jemi treguar miqësor me turqit këtu. A ishte surprizë që pati problematika në fillim të ndeshjes?

Ne jemi munduar që të organizojmë gjithçka në mënyrën më të mirë, por federata turke ka zbatuar disa ligje që ka vendosur qeveria turke për sendet në stadium.

Jemi të sigurt që Andorra dhe Franca luhen në stadiumin e ri?

Në nëntor, stadiumi do inaugurohet me dy apo një ndeshjet e fundit, por inaugurimi final do jetë ndeshja e Francës.

Do doje një mbrojtje të mrekullueshme sot, apo një dyshe sulmi që të shënonte?

E vështirë të thuash çfarë dua të zgjedh në futboll. Nëse nuk funksionojnë mirë, as nuk shënon dot, as nuk barazon dot.

4 vite më parë, kualifikoheshim me Armeninë…

Patjetër që është ditë e rëndësishme, sepse na ka zyrtarizuar pjesëmarrjen në Euro 2016. Uroj të jetë me fat edhe dita sot. Ekipi ka besim edhe sot, por do i tregojë fusha.

Dëshira e Rejas kur fryu qirinjtë…

Më tha se nuk mund të ketë dëshirë tjetër, veçse të fitojë ndeshjen e radhës.

PRONONCIMI PËR RTSH: 

“Atmosfera është fantastike, është e bukur, i motivon të dyja skuadrat. Për atë që është në fushë është motivim maksimal. Ditë e bukur për të luajtur një ndeshje jashtëzakonisht të rëndësishme. Ne për të vazhduar për të shpresuar dhe Turqit për të vulosur kualifikimin.

Unë uroj që atmosferën do ta kemi më të bukur në stadiumin e ri. Do krijojnë një dekor akoma më të bukur se kjo.

Mesatarja e çmimeve të biletave këtu, nuk është më e lirë se në Tiranë. Nuk është fusha ime, nuk e di nëse duhet të ketë armë ose jo në stadium. Kur nuk respektohen ligjet është e domosdoshme të ketë edhe forca të armatosura për të siguruar qetësinë në stadium.

Rinovimi i Rejës? Profesioni i trajnerit më duket një nga më të vështira në botë. Ka ngarkesë maksimale para ndeshjes. Jo vetëm me Rejan por me çdo trajner mundohem ti rrijë më afër, për ti dhënë besim dhe për t’i larguar emocionet. Emocionet që ka trajneri është e vështirë ti mposhtësh.

Le të shohim ndeshjet për rinovimin. Ne jemi të kënaqur se si Reja ka punuar deri tani. Jemi pozitivë. Për deri sa nuk jemi ulur në tavolinë, nuk kam çfarë them. Unë jam shumë i lumtur nëse fitojmë. Me këtë lloj motivi kemi ardhur. Se çfarë do japë fusha duhet ta presim”, u shpreh Duka për RTSH.

PANORAMASPORT.AL

NDIQE LIVE "PANORAMA TV"

---