Aristoteles Romero është lojtari i Partizanit që është ballafaquar më së shumti me kartonin e verdhë në 7 javë kampionat. Madje, dy i mori në ndeshjen e fundit ndaj Teutës, ku e la ekipin me 10 vetë për gati një orë lojë.

Dy kartonët e verdhë që mori ndaj durrsakëve mesfushori nga Venezuela i shlyen me mungesën në Shkodër, kështu që pritet të jetë i gatshëm për trajnerin Lerda në duelin e javës së nëntë me Skënderbeun. Por edhe në kthim Romero rrezikon, pasi i mbeten në fuqi tre kartonët e verdhë që ka marrë më herët. Në këtë situatë, nëse 23-vjeçari ndëshkohet me karton të verdhë ndaj korçarëve, i bie që të jetë i pezulluar për Kukësin, në javën e parë të fazës së dytë, pasi plotëson numrin katër të të verdhëve. Aristoteles Romero mbetet lojtari i vetëm në radhët e Partizanit që ka tre kartonë të verdhë. Kështu që ndaj Vllaznisë asnjë futbollist nuk rrezikon të humbë Skënderbeun nga kartoni i verdhë

BRAUN – Brajan Braun është një nga pesë futbollistët e Partizanit që janë grumbulluar me ekipet kombëtare. Sulmuesi i të kuqve është thirrur nga Xhamajka për dy ndeshjet kualifikuese të zonës “CONCACAF” që kanë përballë Arubas.

Më 13 tetor Xhamajka pret Arubën në shtëpi dhe tri ditë më pas i kthen vizitën. Duke ditur që më 16 tetor i bie të jetë në fushë me kombëtaren xhamajkane, Brajan Braun do të bashkohet me të kuqtë pas dy ditësh. Pra, sulmuesi rrezikon shumë që të përfshihet në planet e trajnerit Lerda për transfertën e Shkodrës. Nëse vjen pa probleme fizike, e shumta që mund të ndodhë është që Braun ta nisë nga stoli përballjen me Vllazninë, e cila luhet fundjavën tjetër.

PANORAMASPORT.AL

NDIQE LIVE "PANORAMA TV"

---