Rikthimi në vendin e “krimit”, kur Andorra shkarkoi Demollarin

Panorama Sport | Lajmet e fundit nga sporti

Postuar: Mars 24, 2019 | 18:23


Rikthimi në vendin e “krimit”, kur Andorra shkarkoi Demollarin

Nga Andorra në Andorra, sërish në pikën zero. Shqipëria rikthehet në vendin ku 17 vite më parë ndodhi çudia, aty ku skuadra bëri një paraqitje të turpshme dhe humbja 2-0 i kushtoi vendin e trajnerit Sulejman Demollarit. Ishte nisja e një epoke të re për Armand Dukën, i cili largoi trajnerin e asaj kohe për t’ia besuar Kombëtaren shqiptare italianit Dosena. Kuqezinjtë do të luajnë sërish aty, për ta nisur nga e para rrugëtimin drejt “Europianit 2020”.

Demollari Trajner

Ervin Bulku ndoshta e mban mend mirë, pasi u fut si zëvendësues në atë ndeshje. Nesër do të jetë trajner për t’i rikthyer kuqezinjtë në shinat e duhura pas një epoke të errët me Kristian Panuçin. Si për rastësi, kundërshtari është i njëjti. 17 vite më parë na turpëroi, ndërsa nesër mund ta bëjmë ne pikën e kthesës.

kombetarja-ndaj-turqise

Sigurisht që ekziston mundësia që historia të përsëritet, sepse në futbollin e ditëve të sotme është bërë e vështirë të mundësh ekipet e vogla. Të gjithë shpresojnë që të ndodhë e kundërta, por duhen kryqëzuar gishtat që Shqipëria të mos i japë lamtumirën Europianit, ende pa nisur mirë…

ÇFARË NDODHI- Raportet ishin krisur me kohë mes trajnerit të asaj skuadre Sulejman Demollari dhe presidentit Armand Duka, i cili gjithsesi vendosi t’i jepte besim pasi u zgjodh në krye të FSHF-së. Por ajo humbje rezultoi fatale për trajnerin e asaj kohe, edhe pse ishte thjesht një ndeshje miqësore. Me humbjen 2-0 ndaj Andorrës, Kombëtarja jonë shkroi faqen më të zezë të historisë së saj. Një kombëtare e shpërfytyruar i dha mundësinë vendit prej 77 mijë banorësh që të festonte një nga ngjarjet më të mëdha të asaj kohe, një fitore në arenën ndërkombëtare që mungonte prej kohësh.

Andorre-Shqiperi 2-0

Andorra e vogël, me madhësi dhe densitet banorësh sa një lagje e Tiranës, arriti të fitonte krejtësisht pastër, me nga një gol në çdo pjesë. Të nesërmen, Duka duke ushtruar pushtetin që i jep funksioni, shkarkoi Demollarin dhe tërë stafin e tij, si përgjegjës për këtë humbje të turpshme. Vendin e tij do ta zinte italiani Dosena. Demollari u shpreh i befasuar për shkarkimin e tij dhe nuk e besoi teksa i njoftuan se nuk do të ishte më trajner i Kombëtares shqiptare.