Revolucion në merkaton e verës, Perez bën gati një “sulm atomik” për Realin
Epokës “Ronaldo” te Reali i Madridit po i vjen fundi dhe Florentino Perez po bën gati revolucionin e madh në merkaton e verës.
Duhen lojtarë të rinj për të rihapur një tjetër cikël fitues në Spanjë, por edhe për të vazhduar dominimin në Europë.
Reparti që do të përfshihet nga ndryshimet e mëdha është ai i sulmit, ku presidenti Perez i ka të qarta idetë dhe lojtarët që do të afrojë.
Dy të sigurt– Nejmar dhe Hazard janë dy dëshirat e para, për të cilat Perez është gati të bëjë çmenduri në merkato. Ai e di shumë mirë çmimin që kanë këta dy kampionë të kalibrit botëror, por kjo nuk e ndalon t’i ëndërrojë në skuadrën e tij dhe të përgatisë planin për t’i afruar.
Nejmar është prej kohësh objektivi kryesor i Perezit, por kohët e fundit filtrojnë lajmet se edhe ai dëshiron të kalojë në Madrid. Kristiano Ronaldo mund të përfundojë në Francë si shkëmbim me Nejmarin, por nga portugezi nuk varet e ardhmja e këtij të fundit.
Një tjetër “galaktik” që mund të transferohet në Spanjë dhe është objektiv i Realit është Eden Hazard. Ende nuk e ka rinovuar kontratën me Çelsin dhe mediat mendojnë se pas tij fshihen spanjollët. Zidan e vlerëson shumë dhe belgu ka thënë se ëndrra e tij është të luajë për këtë trajner.
Sulmi në dyshim– Në listën e dëshirave për sulmuesin kryesor janë 3 lojtarë: Mauro Ikardi, Robert Levandovski dhe Herri Kejn. “Marca” shkruan se është Levandovski i përzgjedhuri i Perezit, por në Itali janë të sigurt se Ikardi është zgjedhja e parë e “galaktikëve”. Por edhe Herri Kejn është në rrugën e duhur për të veshur fanellën e kampionëve të Europës.
NDIQE LIVE "PANORAMA TV"