RETROSPEKTIVË/ Si sot 10 vite më parë, kur Apolonia shpartallonte Partizanin
Apolonia dhe Partizani do të ritakohen në Kategorinë Superiore këtë edicion, ku fierakët rikthehen pas 5 vitesh mungesë. Veç kampionatit, këto dy ekipe mund të përballen me njëra-tjetrën në turin e dytë të Kupës së Shqipërisë, në rast se kualifikohen në të parin.
Mes dy ekipeve ka pasur duele interesante në historikun e futbollit dhe pa dyshim që bilanci është në kahun e “demave”, por nuk mungojnë dhe episode të veçanta kur bardhejeshilët fitonin me shifra të thella. Përpara 10 vjetësh, ekzaktësisht më 30 tetor 2010, Apolonia mposhtte 4-0 Partizanin dhe asokohe militonin në Kategorinë e Parë.
Fierakët kishin krijuar një skuadër simpatike dhe pretendente, nën drejtimin e trajnerit Ernest Gjoka, ndërsa Partizani drejtohej nga i mirënjohuri Neptun Bajko dhe kalonin kohë të vështira. Fierakët i shpartalluan të kuqtë në lojë dhe rezultat.
Protagonist i atij takimi u bë një sulmues jo shumë i njohur, Argent Kalemaj, i çili shënoi tripletë personale, ndërsa “pokerin” do ta plotësonte mesfushori serb Milos Jevdjeviç. Në fund të atij edicioni, bardhejeshilët u ngjitën në elitë dhe Partizani ra në Kategorinë e Dytë. Për nostalgjinë e lexuesve, “Panorama Sport” sjell të plotë skedën e asaj ndeshjeje të një dekade më parë.
KATEGORIA E PARË, 30 TETOR 2010 STADIUMI “LONI PAPUÇIU”
APOLONIA – PARTIZANI 4-0
GOLAT: Kalemaj 18′, 49′, 61′, Jevdjeviç 74′.
APOLONIA: Haxho, Çela (Prifti 46′), Ofoyen, Basriu, Da Silva, Teqja, Jevdjeviç (Muçaj 82′), Gërço, Çimili (Dhrami 73′), Ribaj, Kalemaj; Trajner: Ernest Gjoka.
PARTIZANI: Xhika, Berberi, Pashaj, Pinari, Gjoka, Bakalli, Lleshi (Perlleshi 60′), Tetova (Shkëmbi 69′), Karapici, Xhepa (Dushku 54′), Sulçe; Trajner: Neptun Bajko.
GJYQTARË: E.Dobi (Durrës), G.Bimi (Gjirokastër), R.Çokaj (Lezhë)
VËZHGUES: Gëzim Gaçe (Tiranë)
KARTONË TË VERDHË: Lleshi, Berberi
B.RAMA – PANORAMASPORT.AL
NDIQE LIVE "PANORAMA TV"