Plori i druhet Erzenit: Për Besëlidhjen, si një finale në Shijak
Besëlidhja është gati për transfertën ndaj Erzenit, e cila do të zhvillohet sot në stadiumin “Tofik Jashari” të Shijakut për llogari të javës së 22-të. Lezhjanët shkojnë në këtë ndeshje pas barazimit dramatik ndaj Korabit në stadiumin “Besëlidhja”.
Sigurimi i kreut nga Kastrioti tri javë para mbylljes së sezonit ka bërë që Besëlidhjes t’i mbetet vetëm alternativa e ndeshjeve shtesë për të pretenduar ngjitjen në Superiore, ndaj këto 3 javë të mbetura duhet t’i vlerësojë si finale për të ruajtur vendin e dytë dhe për të qenë në formë në ndeshjet e “play off”-it.
PLORI – I këtij mendimi është edhe trajneri Elvis Plori, i cili në një prononcim për “Panorama Sport”, thekson se Erzeni është një skuadër me vlera, ndaj dhe duhet kujdes i madh për të mos gabuar: “Gjithçka që ka kaluar nuk zhbëhet, ndaj tani të gjithë vëmendjen e kemi te pjesa e mbetur e këtij sezoni. Radhën e ka transferta ndaj Erzenit, një sfidë që e kemi vlerësuar maksimalisht, pasi të gjitha ndeshjet e mbetura po i konsiderojmë si finale.
Po luftojmë ende për ngjitjen në elitë nga ndeshjet shtesë. Erzeni është skuadër që mund të ishte këtu ku jemi ne apo ndoshta edhe në krye, por nuk e di si i doli gjendja jashtë kontrollit. Në Shijak shkojmë me formacion të plotë fatmirësisht, gati të gjithë futbollistët i kam në dispozicion dhe kjo është pozitive.
Do të bëjmë lojën tonë, duke iu përshtatur stilit të kundërshtarit, pasi ashtu siç e theksova edhe më lart, Erzeni ka skuadër të kompletuar, me elementë mjaft cilësorë. Në Shijak duhet të gabojmë sa më pak që të jetë e mundur, pasi vetëm nga kjo mund të përfitojmë për të marrë atë që duam”, tha dje trajneri Plori.
PRENG GJIKOLA
NDIQE LIVE "PANORAMA TV"