Presidenti i Paris SG-së dhe njëkohësisht president i Shoqatës së Klubeve Europianë të Furbollit (ECA), Naser Al Kelaifi e ka kapur keq me dy gjigantët spanjollë, Barcelonën dhe Realin e Madridit. Sulmet e tij ndaj tyre kanë qenë të shpeshta këto javët e fundit dhe me motivacione të shumta. Me Realin e Madridit është përplasur në lidhje me iniciativën e “Los Blancos” për të krijuar Super Ligën Europiane (së bashku me Barcelonën dhe Juventusin).

Ndërsa me Barcelonën përplasjet kanë nisur pas lëvizjeve financiare të bëra nga klubi katalanas, që i dhanë mundësi të qëndronte brenda rregullave të “fair play financiar” të UEFA-s dhe të ndërtonte një skuadër konkurruese në Spanjë dhe Europë. Numri një i klubit kampion në Francë ka dhënë një tjetër intervistë për “Politico”, duke lënë ironitë dhe sulmuar ashpër dhe drejtpërdrejt Barcelonën. Edhe këtë herë thelbin e kritikave e kanë bërë financat e klubit të drejtuar nga Joan Laporta.

Presidenti i katalanasve bëri disa lëvizje në verë, duke shitur një pjesë të rëndësishme të aksioneve të “Barça Sudios” si dhe të drejtave televizive, që së bashku me marrëveshjet e tjera të sponsorizimit si “Spotify”, arriti të arkëtonte rreth 860 milionë euro. Këto shuma i dhanë mundësi klubit të dilte nga kriza financiare ku ishte zhytur. Por këto manovra financiare të Barcelonës vazhdojnë të mos e bindin presidentin e PSG-së, Naser Al Kelaifi. “A është e drejtë ajo çfarë ka bërë Barcelona? Jo, për mua nuk është e drejtë… A është ligjore e gjithë kjo histori e levave financiare? Nuk jam shumë i sigurt”, ka thënë Al Kelaifi, duke iu referuar shitjes së aktiveve të klubit të Barcelonës verën që lamë pas.

“Nëse UEFA do t’ia lejojë, jam i bindur se dhe klube të tjera në Europë do të bëjnë të njëjtën gjë. Unë e di se UEFA ka rregullat dhe mekanizmat e veta të kontrollit dhe të gjithë do të kalojnë në lupën e saj”, ka vijuar ai. Sa për projektin e Super Ligës Europiane, ai është shprehur përsëri i bindur se iniciativa e marrë nga treshja “renegate”, Barcelona, Real Madrid dhe Juventus nuk do të ketë jetë. “Askush nuk do ta lejojë krijimin e Super Ligës”.

PANORAMASPORT.AL

NDIQE LIVE "PANORAMA TV"

---