Vllaznia u ndal në një tjetër barazim në kampionat, këtë herë kundër Egnatias. Shkodranët kanë marrë 4 barazime radhazi në Superiore. Ndeshja me Egnatian u ndoq nga një numër i paktë tifozësh në stadiumin “Loro Boriçi”, ku ndikim ka pasur edhe moti i ftohtë në Shkodër.

“Panorama Sport” ka përpiluar disa nga momentet më pikante të kësaj sfide.

-Në stadium ishte e pranishme një pankartë dedikuar Ramazan Rragamit që u nda para pak ditësh nga jeta: “Legjendat nuk vdesin kurrë”.

-Një fanellë speciale për Ardit Krymin. Mesfushori mbush 200 ndeshje me kuqeblutë. Takim jubilar që u festua me gol.

-Ka një moment frike për dëmtimin e Dianje. Senegalezi vendosi ta provonte edhe një herë duke hyrë në fushë dhe ia doli. -Minuta 14, Vllaznia humb një rast të pabesueshëm ku Aralica dhe Gjurgjeviç nuk arrijnë të dërgojnë topin në rrjetë. Shkodranët nuk u besojnë syve.

-Portieri Zogoviç në një moment nxehet te zona e tij, duke parë edhe motin e ftohtë në stadium. -Shpërthen në gëzim Egnatia, Ademi pas një inkursioni personal shënon një gol mjaft të bukur. Gol që irriton tifozët shkodranë me ekipin e tyre.

-Brdariç shumë aktiv duke dhënë udhëzime për skuadrën e tij duke kaluar edhe zonën e lejuar. Ndërsa Ramadani, pavarësisht se qëndroi thuajse gjatë gjithë kohës në këmbë, u duk shumë i qetë.

-Ka një diskutim për të goditur një gjuajtje të lirë. Kruja dhe Da Silva diskutojnë mes tyre dhe në fund gjuan braziliani, i cili e çon topin mbi traversë.

-Zogoviç bën një ndërhyrje vendimtare me këmbë, ku Xhekson i vetëm përballë tij “hipnotizohet” nga malazezi. Duartrokitje për gardianin kuqeblu.

-Krymi shënon në ndeshjen e tij të 200-të. Goli i parë këtë sezon për mesfushorin. -Ka duartrokitje për Shtubinën në rastin e aktivizimit të mesfushorit shkodran të Egnatias.

-Në fund zhgënjim te tifozët shkodranë që kontestojnë skuadrën e tyre që humbet terren në luftën për titullin kampion. Ndërsa tek Egnatia janë të kënaqur pasi marrin një pikë shumë të rëndësishme në garën për mbijetesë.

A.URUÇI-PANORAMASPORT.AL

NDIQE LIVE "PANORAMA TV"

---