Stadiumi “Skënderbeu” u ngjante dje kohëve të arta, teksa mbi 5 mijë tifozë ishin ulur për të ndjekur ndeshjen kundër Flamurtarit. Banderola thumbuese, ofendime në kor dhe shumë mysafirë. Këto, por jo vetëm, janë disa nga pikantet që përcjell “Panorama Sport”.

* 50 ultras nga Vlora kishin udhëtuar për të mbështetur ekipin e tyre të zemrës, Grupimi “Flota Kuqezi” nuk rreshti së përkrahuri Flamurtarin gjatë gjithë 90-minutëshit. Edhe “Ujqërit e Dëborës” ishin të organizuar, teksa në tribunën C kanë përkrahur pa fund ekipin e tyre, duke ndezur në disa momente edhe flakadanë.

* Në pjesën e parë, tifozët korçarë kishin shpalosur një banderolë ironizuese për vlonjatët, në të cilën shkruhej: “Vazhdojnë ëndrrat tek krevati, Barcelona, Beogradi. Europën nuk shikoni, kampionatin ta harroni”.

* Presidenti i Flamurtarit, Sinan Idrizi, mbërriti një orë përpara në ambientet e stadiumit “Skënderbeu” dhe menjëherë u takua me homologun e tij, Ardjan Takaj, duke e ndjekur ndeshjen afër njëri-tjetrit.

* Dje nuk kanë munguar as kryebashkiaku i Korçës, Sotiraq Filo, si dhe ish-deputetët e Korçës, Ridvan Bode dhe Gjergji Papa.

* Takimin e ndoqi edhe ish-presidenti i Elbasanit, Arben Laze, që nuk i kurseu batutat me Takajn dhe Idrizin.

* Afro 15 gazetarë nga Vlora kanë qenë dje mysafirë në tribunën qendrore. Korçarët u treguan bujarë, duke u lëshuar vendin miqve.

* Në minutën e 17-të dhe, më pas, në të 83-ën, gjyqtari Andi Koçi ndali lojën për shkak të sharjeve të tifozëve në shkallët e stadiumit. Kapiteni Orges Shehi u detyrua të linte portën dhe qetësonte ultrasit.

 

* Në momentet e fundit të ndeshjes, pas shtatë minutave shtesë të akorduara, duke qenë se loja u ndërpre për shkak të incidentit të vëllait të Osmanit, pati një kaos me ndërrimet. Gjyqtari i katërt, Fatmir Lama, i habiti të gjithë. Mbrojtësi Fidan Aliti qëndroi për afro katër minuta më kot, pasi nuk u fut dot në lojë.

* Trajneri Shpëtim Duro u pa shumë i revoltuar në fundin e takimit, veçanërisht me veprimin e një prej mbrojtësve. Në shenjë pakënaqësie për lojën, Duro u largua drejt dhomave të zhveshjes dy minuta para se të mbyllej takimi.

NDIQE LIVE "PANORAMA TV"

---