Partizani-Luftëtari ose Klevis Dalipi kundër Hasan Likës. Ky takim i javës së 24-t mund të konsiderohet edhe si një duel mes nxënësit dhe profesorit.

Pas largimit të Sulejman Starovës (ish-profesori i Hasan Likës në fillimet e karrierës si trajner, por edhe bashkëtriumfues në titullit e fundit të “demave”, në vitin 1993), drejtimi i Partizanit i kaloi Klevis Dalipit.

Si për ironi të fatit, Dalipit i duhet që të debutojë përballë trajnerit me të cilin hodhi hapin e parë te të kuqtë, në fillim të sezonit 2013- 2014, që përkonte me rikthimin e “demave” në Superiore.

Hasan Lika ishte trajner i Partizanit, ndërsa Dalipi ishte ndihmësi i tij i parë. Bashkëpunimi mes tyre përfundoi në shkurt të 2014-ës, pikërisht pas humbjes 1-0 në derbi që mbetet edhe triumfi i fundit i bardhebluve ndaj rivalëve të kuq.

Për shumë arsye, Klevis Dalipi kërkon të dalë triumfues në debutim ndaj më- suesit, të cilit ia njeh filozofinë e drejtimit. Kjo mund të përbëjë një avantazh për trajnerin elbasanas, por, gjithçka varet nga lojtarët e dy ekipeve sesi do t’i interpretojnë urdhrat e trajnerëve.

Ky duel shikohet si një busullë drejtimi për të dyja klubet, pasi nga përfundimi i kësaj sfide mund të shikohet trajektorja e sezonit.

Luftëtari vjen në këtë sfidë me dy pikë më shumë se të kuqtë, me 11 ndeshje radhazi pa humbje, si dhe në përballjen e fundit në Gjirokastër i kanë shkaktuar Partizanit humbjen më të thellë në histori, 5-0.

Të besuarit e Likës kërkojnë pikë në kryeqytet, në mënyrë që të realizojnë synimin për të siguruar një biletë për në Kupat e Europës.

Partizani mendon vetëm fitoren, e para për debutimin e Dalipit dhe e dyta për të besuar edhe ata për të zënë një vend në Europë.

Një humbje në këtë takim mund të bënte që Partizani ta shikonte me dylbi Europën, por mund të rriste frikën e skenarit të frikshëm, që të përfundojnë për mbijetesë.

Të dy ekipet kërkojnë që trajektorja të vijojë për lart, ndërsa humbja mund të ndikojë më shumë për keq te Partizani, i cili deri tani ka qenë një ekip amorf.

Të dyja skuadrat kanë pasur probleme me gjykimin, por me trajektore të kundërta. Gjirokastritët janë ankuar shpesh në fazën e parë, ndërsa Partizani është ndjerë “i vjedhur” në ndeshjet e luajtura në 2018-ën.

ILIR CARA

NDIQE LIVE "PANORAMA TV"

---