Partizani nuk ka çfarë të kursejë sot apo të bëjë plane për ndeshjen e radhës në kampionat, pasi ndaj Besëlidhjes luhet fati i Kupës. Humbja 3-0 në Lezhë bën që angazhimi të jetë maksimal në kampin e kuq, ndaj pritet që trajneri Adolfo Sormani të hedhë në fushë formacionin më të mirë të mundshëm. 

Gjithsesi, pritet që të ketë edhe ndonjë ndryshim në përbërje, nisur nga dy ndeshjet e fundit ku kryeqytetasit kanë triumfuar në kampionat. Me shumë mundësi sot do të jetë momenti i Dorian Kërçikut për të debutuar me skuadrën e parë të Partizanit. Ish-mbrojtësi i Tiranës do të pozicionohet në krahun e djathtë dhe ky takim i sotëm shikohet  edhe si një test për vazhdimësinë e tij për të siguruar rolin e titullarit.

Broja nuk luajti ndaj Flamurtarit, por sot pritet të jetë i gatshëm, pasi e ka kaluar problemin. Sa i përket sulmit, trajneri ka praktikuar disa module, pasi dihet se shpresat e kualifikimit mbeten pikërisht tek efektiviteti i këtij reparti. Nuk është çudi që Solomon e Braun ta nisin së bashku nga minuta e parë dhe Bardhi të përdoret në pjesën e dytë, për të shtuar presionin mbi kundërshtarin. Kërkohet që skuadra të jetë agresive që në start dhe golin ta gjejë sa më shpejt që të jetë e mundur.

/PANORAMASPORT.AL/

NDIQE LIVE "PANORAMA TV"

---