Sa vjen asambleja, futbolli shijon “tamponin”…!
GËZIM SINEMATI
Mos harroni dorën, se koka nuk ju duhet në asamblenë e përgjithshme! Ky do të ketë qenë slogani i ftesës së FSHF-së për klubet e futbollit, kur shikon se sistemi i “dorës në allçi” është përsosur edhe në versionin online. Edhe në kohën e pandemisë, kur e gjithë bota e futbollit ka hapur gojën për të marrë tamponin e shumëpritur, këtej në anët tona, “tamponi” që përdoret në asamble është çudibërës nga efekti.
Një ilaç, i cili nuk gjendet në asnjë habitat tjetër në hartën e futbollit, ku koka të ulet poshtë dhe dora të ngrihet lart. Edhe kjo asamble, së cilës ia kanë vënë një mbiemër të rremë “e zakonshme”, nga doza e përqindjeve të votimit duket e pazakontë, disi anormale… Aq e pazakontë, sa mund të thuhet se futbollin e votave e kanë tredhur me rrënjë moralisht, saqë FSHF po ngjason me një parti despotike, më shumë sesa me një organizatë sportive…
Kjo asamble do të kujtohet për hapjen spektakolare. Ç’ishte ai falënderim thumbues ndaj shtetit qysh në minutat e para? Si mund të harrohet hapja e saj bujëmadhe, tamam si në ato ndeshjet e pabesa, ku më shpejt vjen goli sesa bie bilbili i arbitrit? Ku do të gjendet një asamble tjetër, ku qeveria e futbollit ka djegur të gjitha “skedinat parashikuese”…? Dhe ishte vetë presidenti Duka (dhe jo më tellallët), autori i një falënderimi driblues për zotin Rama:
“Ju falënderoj për mosbashkëpunimin dhe injorimin që bëtë qoftë për ndihmën financiare të personave që punojnë në futbollin shqiptar, por edhe për rinisjen e kampionatit”. Ishin fjalë që përlotën qysh në fillim anëtarët e “kongresit”, sa dikush kishte kujtuar me nostalgji takimin e fundit të presidentëve me zotin Rama, kur shefi i politikës dhe ai i topit ia pasonin topin me sy mbyllur njëri-tjetrit, ndryshonin kaq me marifet rolet gjatë “lojës”, sa nuk merrej vesh në ca momente se cili ishte kryeministri e kush na ishte presidenti i futbollit…
PANORAMASPORT.AL
NDIQE LIVE "PANORAMA TV"