Mblidhen urgjent “masonët” e arbitrimit, edhe pse mungon “prindi i madh”

Panorama Sport | Lajmet e fundit nga bota e sportit

Postuar: Janar 30, 2020 | 16:47

FB Kategoria Superiore Lajmi i fundit Opinion

Mblidhen urgjent “masonët” e arbitrimit, edhe pse mungon “prindi i madh”

GËZIM SINEMATI

Sinemati

Ishte e sigurt që momenti po afronte, por vetëm dita nuk dihej se kur do të ndodhte. Sa herë që “nxënësit” e kësaj klase tërbohen, nuk pyesin as për “prindërit”, atëherë, sipas zakonit, vjen dita e… dajakut!

Arbitrat e Superiores janë thirrur urgjent në një takim me “prindërit”, për fatin e bardhë të tyre, pa prindin e madh, presidentin Duka, të cilin e kanë frikë shumë kur i flakëron me fjalorin e tij. Shefi poshtë shefit, Shulku, dhe “i përjetshmi” i urtë, Kastrati, u kanë zbuluar arbitrave zemërimin e “perëndive” në FSHF.

Ç’janë këto hata që po ndodhin me fillimin e 2020- ës? Mos jeni “prekur” gjë nga koronavirusi kinez? Në ato momente lindi pyetja: U balsamosën ata që kishin bërë gafa spektakolare apo u ndëshkuan vetëm ata që dolën jashtë kontrollit të telekomandës…? Sido që të jetë, një gjë kemi mësuar nga takimet me “prindër” të arbitrave…

Arbitrat45

Gabimet do të vazhdojnë, mund të ketë edhe javë ku lajthitja të shfaqet… Superiore, por thelbi është që gabimet do të kategorizohen njerëzore vetëm nëse janë pjesë e skemës së parafabrikuar nga mjeshtrat. Edhe pse thuhej se do të dilnin në tabelën e zezë ata që kishin bërë gafat më të spikatura, ajo që ndodhi tregon se ka shenja drite edhe në tunelin e errët të këtyre javëve.

Goli që pësoi Partizani, ai që u quajt “fantazmë” apo “gjysmëgoli”, për të cilin gishti fajtor shkonte tek arbitri i linjës, është nderuar si “Grali i javës”.

Le të thonë ekranet dhe gazetat se ishte blasfemi, për familjen tonë do të mbetet një vendim që vlen për… të gjithë brezat! U përcollën edhe fjalët e shefit të madh, ku arbitrat u ngjallën, u çuan në këmbë me duartrokitje: “Ne nuk kemi teknologji, por kemi njerëz që vlejnë edhe më shumë se teknologjia…”.

* Shënim: Artikull ekskluzivisht për “Panorama Sport”. Ndalohet kopjimi dhe riprodhimi pa lejen e kompanisë.




Për t’u bërë pjesë e grupit të "Panorama Sport" mjafton të klikoni: Join Group dhe kërkesa do t’ju aprovohet.
KOMUNITETI PANORAMA SPORT: https://www.facebook.com/groups/sportionline/

www.minuta90.com