GËZIM SINEMATI

 

Sikur ta dinin tifozët e Bajernit të Mynihut se sa kushton bileta më e shtrenjtë dhe më e lirë për të parë Kombëtaren e Shqipërisë, atëherë, me siguri, do të kërkonin falje për gjestin e tyre protestues. Madje do të na e kishin falur me gjithë shpirt pankartën e tyre që bëri bujë.

Ajo që provokoi më shumë mbresa, sesa vetë spektakli i Mbapes, Nejmarit dhe Kavanit në portën e Bajernit, ishte një pankartë sfiduese, ku shkruhej me të mëdha: “Ne nuk jemi Nejmar”. Arsyeja ishte europiane dhe jo shqiptare: kishin prerë biletën më të shtrenjtë për të parë ekipin e zemrës… 75 euro!

Nga doli ky çmim? Të gjithë fajin e ka Nejmar, shpjegojnë francezët, duke kujtuar botën se një mal me para avulluan afro 400 milionë euro, vetëm për dy sulmues, që do shfaqeshin në një stadium, i cili, vetëm tani, e meriton plotësisht emrin “Parku i Princave”. Një ditë, qoftë e largët, vetëm princat do ta shijojnë cirkun e shfrenuar me top…

Kur gjermanët që krenohen për pushtetin në futboll, madje edhe më shumë për ekonominë sfiduese, qahen për çmimin e biletave, çfarë duhet të bëjnë shqiptarët unikalë në varfëri, kur një biletë në tribunë e blejnë 120 euro! Aq sa i vjedh rrogën mujore punëtorit, ndërsa shumicës i gllabëron “vetëm”… gjysmën e saj.

Pale bileta më e lirë, edhe ajo s’ta kursen portofolin, kushton sa tribuna në ndeshjen e Strumicës, 10-15 euro. Gjermanët e Bavarisë, ata që përmbytin me birrë tërë rruzullin në muajin tetor, i dorëzohen logjikës kur protestojnë “Ne nuk jemi Nejmar”, kurse shqiptarët nuk e kanë zakon t’i dorëzohen as logjikës e as portofolit të tejlodhur, edhe pse janë të bindur se futbolli i Kombëtares tyre është mjaft i lirë në fushë dhe tejet i shtrenjtë në biletari.

Aq sa duhet të gëzohesh kur i shikon përtej kufirit dhe jo kur janë në shtëpi. Kujtoni ndeshjen në Palermo, prapë Italia ishte, po depërtoje në stadium pa u ndier i vjedhur. Apo kur kujton se Spanja e madhe, ndërsa luajti me Italinë në fushën e saj, uli çmimet e biletave, vetëm e vetëm që stadiumi të mbushej plot dhe lojtari i 12-të (tifozët) të “luante” përkrah Iniestës.

Ky lojtar ka vite që është “vrarë” në stadiumet tona edhe pse kërkojmë ta mbajmë gjallë me frazën e spikatur të hipokrizisë se “kemi tifozerinë më të bukur në botë”. Apo ajo tjetra që të merr për budalla: “E doni Kombëtaren? Paguani se kjo është familja juaj e vërtetë”.

NDIQE LIVE "PANORAMA TV"

---