Shuhen dilemat, Besa vendos për trajnerin. Nuk do të ketë ndryshime në pankinë, pasi presidenti ka rikonfirmuar Ndriçim Kashamin. Me mbylljen e kampionatit u shtuan pikëpyetjet për stolin.

Kavajasi u largua, ndërsa Nexhat Bizhdili nisi negociata për të riun. U përfolën shumë emra, por më konkreti ishte Klevis Dalipi.

Ky i fundit zhvilloi disa takime me kreun e klubit, por akordi nuk erdhi kurrë. Pas kësaj piste, nisën edhe sugjerimet nga menaxherë të ndryshëm, siç ishte edhe rasti i Veljko Dovedanit. Serbo-boshnjaku që drejtoi Bylisin në tri sezonet e fundit, ishte një opsion.

E megjithatë, situata përmbyset katërcipërisht. Pas negociatave të fundit, presidenti ka menduar që të vazhdojë me trajnerin që mbylli sezonin. Është ai vetë që e ka konfirmuar këtë lajm enkas për “Panorama Sport”, ndërsa shprehimisht tha: “Trajner do të jetë Ndriçim Kashami dhe ndihmës Meglid Mihani, nuk ndryshon as përgatitësi i portierëve. Për këtë rol mbetet Taulant Gurma”.

Kujtojmë se trajneri erdhi në krye të pankinës së verdhezinjve në fazën “play off”, pas dorëheqjes që dha Artan Mërgjyshi. Ecuria e tij te kavajasit ka qenë e suksesshme dhe duket se projekti që i ka paraqitur klubi, ka bërë që t’i besohet stoli edhe për një vit. Pretendimet e Besës do të rriten ndjeshëm këtë vit, të paktën këtë ka paralajmëruar vetë Bizhdili.

Ai e ka thënë qartazi se do të ndërtojë ekipin më të fortë të 6 viteve të fundit, me objektivin e vetëm: ngjitjen në elitë. Pasi u vendos për trajnerin, me shumë interes priten zhvillimet në merkato. Janë premtuar afrime cilësore, por zyrtarisht nuk ka pasur firma.

FERIZ FERIZAJ – PANORAMASPORT.AL

NDIQE LIVE "PANORAMA TV"

---