Laçi nuk humb kohë. Sulejman Starova ka “arkivuar” barazimin pa gola në Elbasan për llogari të Kupës së Shqipërisë dhe ka filluar menjëherë përgatitjet për javën e 5- të. Kurbinasit udhëtojnë në Vlorë këtë fundjavë dhe kërkohet jo vetëm vazhdimësia, por edhe fitorja e parë në transfertë për këtë sezon.

Grupi ka qenë i plotë në seancën e djeshme dhe është shfaqur tejet i përkushtuar. Stafi teknik është duke u marrë me rikuperimin e gabimeve të shfaqura deri në këtë fazë të kampionatit dhe mbi të gjitha me perfeksionimin e sulmit, që duhet thënë ka shënuar shumë pak, vetëm 2 në 4 javë. Rëndësi ka marrë edhe fiksimi i formacionit dhe mbetet për t’u parë nëse do të ketë ndryshime, apo do i besohet 11-shes fituese me Partizanin.

“Bobi” nuk i beson krizës së Flamurtarit, ndaj pret që skuadra të jetë e mirëvendosur në fushë dhe e përqendruar nga minuta e parë e deri në fund për të mos i lënë asnjë hapësirë kundërshtarit. Statistikat nuk i kanë fort në krahë para këtij dueli. Laçi nuk fiton që nga 2017-ta në Vlorë. I fundit trepikësh për bardhezinjtë përkon me 17 dhjetorin e atij viti, teksa i nderonte goli me penallti i Arturo Rexhinaldos. Që prej 21 muajsh, kanë udhëtuar tri herë të tjera në qytetin bregdetar dhe maksimumi kanë marrë një pikë prej një barazimi të “thatë”, pasi në dy transfertat e fundit kanë triumfuar vlonjatët me rezultat minimal.

/PANORAMASPORT.AL/

NDIQE LIVE "PANORAMA TV"

---