Pavarësisht fitoreve në kampionat dhe shkëputjes prej 11 pikësh nga vendi i dytë, Skënderbeu vijon të jetë ende në pritje të dy lojtarëve që do të plotësonin grupin e trajnerit Ilir Daja.

Në një situatë të tillë, e gjithë vëmendja është e përqendruar tek Afrim Taku dhe Bakari Nimaga, të cilët janë larg nga Skënderbeu në këtë kohë.

Afrim Taku ndodhet ende në pritje të Green Cardit në Shtetet e Bashkuara të Amerikës për të marrë sërish rrugën drejt Korçës, atje ku Skënderbeu e pret prej kohësh.

Lajmi për një kthim të Takut ishte programuar më datë 10 shkurt, por duket se vonesa e dokumentacionit përkatës bëri që Taku ende të mos duket në Korçë.

Në këtë situatë, duket se data 20 do të jetë dita kur Taku të mbërrijë në Korçë pranë ekipit me Dajën që po e pret afrimin e tij.

Pavarësisht se larg nga Amerika, Taku ka vijuar programin stërvitor individual dhe forma e tij pritet që të jetë e mirë. Por sërish ka nevojë për kohë, me qëllim që të hyjë plotësisht në ingranazhet e ekipit.

Në krahun tjetër, Bakari Nimaga është ende në Mali dhe nuk dihet se kur do të kthehet pranë ekipit.I larguar pa lejen e trajnerit Ilir Daja, por me leje të marrë nga presidenti Takaj, mesfushori do të duhet të zbusë inatin e trajnerit bardhekuq që sigurisht nuk do të jetë aspak i kënaqur nga kjo mungesë e tij në ekip.

Nuk dihet ende se kur Nimaga do të bashkohet me Skënderbeun dhe pritet që rikthimi i tij të shkaktojë një mbledhje në radhët e bardhekuqve.

NDIQE LIVE "PANORAMA TV"

---