Duke përfituar nga ndërprerja e kampionatit, stafi teknik i Kastriotit ka programuar një ndeshje miqësore me fqinjët e Ilirisë. Takim që do të luhet sot në orën 14:30 në stadiumin “Kastrioti” në Krujë. Kjo miqësore pritet t’i shërbejë skuadrës për të mbajtur formën optimale, por edhe për të ndrequr diçka nga ndeshjet e shkuara.

Një mundësi e mirë për të shfaqur aftësitë e tyre do të jetë edhe për ato lojtarë që ende nuk kanë marrë minuta në kampionat. Pas fitores ndaj Kamzës, Kastriotin e pret një transfertë mjaft e vështirë me Laçin fundjavën e ardhshme, dhe tekniku Stavri Nica po e përgatit me mjaft kujdes këtë sfidë. Përballja me kurbinasit vjen në një moment mjaft të mirë për krutanët ku fitorja e fundit, por edhe lojërat e zhvilluara ndaj Skënderbeut dhe Partizanit japin besim se ndaj kurbinasve mund t’ia dalin, pavarësisht se kjo ndeshje do të luhet në transfertë dhe ndaj një kundërshtari që ka qenë surpriza e këtij sezoni në Kategorinë Superiore.

FAZA– Trajneri Stavri Nica ka disa ditë që po përgatit ekipin, duke zhvilluar një minifazë përgatitore me dy seanca në ditë. Stërvitja me dy seanca do të vijojë deri ditën e shtunë, ndërsa nga java e ardhshme skuadra do të hyjë në rrjedhën normale të kampionatit.

STADIUMI – Lajme të mira vijnë edhe nga infrastruktura e qytetit. Sa i përket rindërtimit të stadiumit të Krujës, drejtuesit shpresojnë që në ditët e para të dhjetorit të nisin punimet, teksa Kastrioti gjatë gjithë sezonit do të zhvillojë takimet e shtëpisë në fushën sportive “Redi Maloku” të Fushë-Krujës.

Bujar Balliu

NDIQE LIVE "PANORAMA TV"

---