Trajneri Lionel Skaloni ishte një ndër personat që luajti një rol kyç në shpalljen e Argjentinës si kampione bote. Në një intervistë për ‘El Partidazo’ de COPE, ai rrëfeu emocionet e finales, foli për marrëdhënien e tij me Mesin dhe se si jeta e tij kishte ndryshuar pas Botërorit të Katarit.

Çfarë bëre kur u emërove në krye të pankinës së Argjentinës?

“Gjëja e parë që bëmë unë dhe Aimar kur u emëruam në krye të Kombëtares ishte një video-telefonatë me Mesin. Gjëja e parë që i thamë ishte “Të presim. Kthehu. Dhe kështu ishte, ai erdhi në 7-8 muaj dhe gjeti një grup të mrekullueshëm.”

Si mund ta përshkruani evenimentin e Botërorit të Katarit?

“Kupa e Botës ishte një film dhe një udhëtim i jashtëzakonshëm. Çelësi i të gjithë kompeticionit ishte ta shijoje duke ditur se sa e vështirë ishte dhe se kushdo mund ta fitonte atë.”

Si e komentoni deklaratën pas fitores?

“Unë u preka dhe nuk mund të vazhdoja. Ne ndjemë se ishte një moment spektakolar. Kur një skuadër si Argjentina e arrin atë është e mrekullueshme. Si lojtar nuk mund të luaja në këtë Kombëtare të Argjentinës. Nuk do të kisha vend në këtë Kombëtare, as të shoqëroja, si në vitin 2006. Niveli është rritur shumë. Unë ngjaj me De Pol, por ai është shumë më i mirë.”

Polemikat për gjestet e portierit “Dibu” Martinez

“Ka qëndrime me të cilat Dibu Martinez nuk do të jetë i lumtur, por ai është një djalë spektakolar. Ai është një fëmijë. Është e pabesueshme se sa djalë i mirë është, duhet ta takoni. Ishte një nga zbulimet që na dha një gëzim të jashtëzakonshëm. Ai ka një personalitet që i ka dhënë shumë grupit. Ka qëndrime, por ai është një ‘bebe'”.

Lidhur me ndeshjen çerekfinale kundër Holandës, të arbitruar nga Mateu Lahoz, Skaloni pranoi se “nuk e bënë të lehtë” dhe atmosfera e krijuar më parë nga Luis Van Gal e turbulloi lojën. 

“Ata provokuan para se ta luanin dhe trajneri i tyre tha disa gjëra që të ndezën. Loja ishte e nxehtë por jo më shumë se normalja. Kur ata të sulmojnë, duhet të përgjigjesh” tha Skaloni, i cili tregoi një anekdotë të marrëdhënies së tij me Mateun.

“Në një ndeshje Malaga-Majorka ai më kërkoi një fanellë. Ishte ndeshja e tij e parë ose e dytë. Ai është një arbitër i madh, nuk kam dyshim, por ndeshja nuk ishte e lehtë për të pasi u nxeh”.

Kë zgjidhni mes Maradonës dhe Leo Mesit, dy lojtarët më të rëndësishëm në historinë e Argjentinës?

“Nëse më duhet të qëndroj me një, do të qëndroj me Leon, me të cilin kam diçka të veçantë. Ai është më i miri në histori, edhe pse Maradona ishte gjithashtu i mrekullueshëm”.

Stërvitja e Mesit nuk është e vështirë

“Të stërvitësh Mesin nuk është e vështirë. Në nivel teknik ai nuk mund të korrigjohet, por nganjëherë ka presion ose i shpjegohet një mënyrë sulmi. Të presësh, të vjedhësh topa dhe kur ka gjak, ai është numri një”.

Një nga të panjohurat që Skaloni nuk ka dashur të zbulojë është se si janë negociatat për vazhdimësinë e tij si trajner i Argjentinës.

 “Unë jam duke udhëtuar në Buenos Aires këto ditë, shpresoj të ulem me presidentin dhe të shohim nëse arrijmë marrëveshjen që duam. Kam një marrëdhënie të mirë, e falënderoj për mundësinë dhe kur të shkoj do të njoftojmë se çfarë do të arrijmë”, është shprehur ai.

I pyetur për mundësinë nëse ai do të ishte trajner i Spanjës në të ardhmen, Skaloni ishte i hapur. 

“Pse jo? Spanja më dha shumë dhe është shtëpia ime e dytë. Ata më trajtojnë jashtëzakonisht mirë dhe ndihem pjesë e këtij vendi. Edhe pse mendoj se Spanja ka të drejtë të ketë një trajner spanjoll… De la Fuente më mësoi në kursin e trajnerit dhe ai është një djalë i mrekullueshëm. Sa më shpejt që të mundem, unë do të shkoj ta takoj atë”.

Argjentinasi Pedri… por jo si titullar i padiskutueshëm

Nëse do të zgjidhja një lojtar spanjoll për skuadrën time do të ishte Pedri. Nuk e di nëse do të ishte si titullar, por do ta merrja me vete”.

Jeta e tij e re si kampion bote

“Dalja dhe ecja e qetë në rrugë nuk është më aq e lehtë, as në Majorka. Jeta ime ka ndryshuar shumë. Një spanjoll, një italian, një argjentinas, për të mos thënë… Kjo është ajo që të mbush më shumë me krenari. Pas Kupës së Botës, njerëzit kaluan nëpër qytetin tim, Pujato, dhe thanë ‘Të shohim nëse është Skaloni atje’. Ata erdhën nga disko dhe u ndalën për të kënduar një këngë në shtëpinë e prindërve të mi. Dikush qëndroi të flinte derisa unë u largova ditën tjetër…

PANORAMASPORT.AL

NDIQE LIVE "PANORAMA TV"

---