Nga FSHF-ja te skuadra, Halili merr me radhë lojtarët e Tiranës
Menjëherë pas mbledhjes së Komisionit të Etikës, presidenti i Tiranës, Refik Halili, nuk ka humbur kohë dhe ka takuar skuadrën e tij, pikërisht para sfidës me Bylisin. I pritur nga drejtori sportiv, Arbi Laçi, dhe menaxheri i skuadrës, Mario Nikolli, Halili diskutoi me skuadrën për situatën në ekip.
Për rreth 20 minuta, Halili kreu ritualin e zakonshëm me futbollistët, duke u ngujuar në “Skënder Halili” dhe duke i dhënë zemër. Pasi është diskutuar për ndeshjen, skuadra ka dalë në stërvitje, ndërsa presidenti ka qëndruar i ngujuar në dhomat e zhveshjes, duke takuar disa lojtarë të veçantë.
Halili si fillim zhvilloi një takim me dyshen amerikano-latine Agustin Torasa dhe Elton Kale. Lojtarët kanë diskutuar me presidentin për të ardhmen dhe jo vetëm. Më pas diskutimi është zhvilluar me Tefik Osmanin që dje nuk u stërvit. Menjëherë pas dyshes amerikane, e pati radhën Ilion Lika që takoi presidentin e bardhebluve.
Me kapitenin e tretë Halili qëndroi më gjatë dhe besohet se ka diskutuar për atë çfarë është diskutuar në Komisionin e Etikës. Pas më shumë se 20 minutash stërvitje Halili u largua nga qendra stërvitore bardheblu.
Kujtojmë që Tirana ka si qëllim finalen e Kupës së Shqipërisë. Edhe vjet ajo luajti në finale, por nuk ia dali të fitonte, ndërsa këtë vit ka mundësinë që të marrë dy trofetë e futbollit shqiptar.
PANORAMASPORT.AL
NDIQE LIVE "PANORAMA TV"