Napoli hidhet në sulm për Gonzalo Higuainin e Realit
Për momentin e vetmja gjë e sigurt është se e ardhmja e sulmuesit të Realit të Madridit, Gonzalo Higuain, është larg kryeqytetit spanjoll. Lojtari do të largohet nga “Bernabeu” në muajt e ardhshëm, por ende është mister destinacioni i tij. Momentalisht skuadra më e avantazhuar për të siguruar shërbimet e lojtarit është Juventusi, që prej kohësh ka nisur bisedimet me klubin e Realit dhe me vetë Higuainin. Por, sipas asaj që raportojnë mediat italiane, në orët e fundit në “luftë” për të siguruar shërbimet e argjentinasit është futur edhe ekipi i Napolit, i cili mësohet se ka biseduar me Realin duke i kërkuar informacione për lojtarin. Gjithmonë duke iu referuar mediave italiane, sulmuesi argjentinas mund të transferohet në Napoli, në rast se Edinson Kavani do të përfundojë te klubi spanjoll.
