Mungojnë Progni dhe Bardhi, Partizani planifikon një sulm të ri kundër kampionëve
Pas eliminimit nga Kupa e Shqipërisë dhe me 15 pikë diferencë nga vendi i parë në kampionat, të kuqtë rrezikojnë shumë për të siguruar një biletë europiane.
Ndeshja e radhës, ku të hënën presin në shtëpi kampionët në fuqi të Kukësit, merr një rëndësi të veçantë për “demat”, të cilët në 17 ndeshjet e mbetura, u del për detyrë që të marrin maksimumin për t’i bërë një shpëtim minimal sezonit 2017-2018.
Në këtë takim, problemet janë të konsiderueshme pasi ndaj Laçit, të kuqtë humbën sulmin. Gerhard Progni dhe Jurgen Bardhi janë të pezulluar, pasi kanë plotësuar numrin katër të kartonëve të verdhë.
Në këto kushte, stafit teknik i del për detyrë që të gjejë alternativa të reja për sulmin. Në parim, Lukas dhe Abdurrahimi shikohen si zëvendësuesit idealë, pasi Çani shikohet i pamundur edhe për Kukësin.
Gjithashtu, pritet të mësohet edhe gjendja e Bruno Telushit, që mungoi në Kupë ndaj Flamurtarit, si dhe mundësia që Kalari të riaftësohet për të hënën. Ekipi ka qenë pushim dje dhe nga sot do të nisë puna, si dhe strategjia që do të ndjekë stafi për sfidën e 19 shkurtit me Kukësin.
NDIQE LIVE "PANORAMA TV"