Nga pikët, te fitoret, humbjet, golat dhe për më tepër vlera si skuadër. Skënderbeu i këtij sezoni nuk ka lidhje me atë të kampionatit të kaluar pas 13 javëve të para.

Edhe pse kanë ndryshuar shumë gjëra nga viti i kaluar dhe aktualisht trajneri Ilir Daja drejton një ekip relativisht të ri dhe me pak emra me peshë, sërish vlen për t’u theksuar se skuadra që udhëhiqej nga Orges Shehi nuk ka asnjë lidhje me atë që përfaqëson sot Skënderbeun. Megjithatë, në një kampionat të çuditshëm si ky aktuali, Skënderbeu është duke bërë mirë në javët e fundit kryesisht, duke arritur të marrë dy fitore radhazi dhe për rrjedhojë është ngjitur në vendin e katërt të klasifikimit me 20 pikë, vetëm pesë pikë më pak se Partizani i vendit të parë.

Por, nëse bën një krahasim me Skënderbeun e sezonit të kaluar, diferencat janë mjaft të mëdha. Gjithçka nis nga vlera e ekipit. Sipas faqes së specializuar, “Transfermarkt”, korçarët e një sezoni më parë vlenin plot 6.63 milionë euro, duke iu referuar lojtarëve që bardhekuqtë kishin në përbërje. Ndërsa këtë sezon ekipi bardhekuq që ka në dispozicion Daja vlen vetëm 2.85 milionë euro, pra rreth 4 milionë euro më pak se ai që drejtonte Shehi.

Diferenca këto që vihen re edhe në renditjen e klubeve, sipas vlerës së tyre. Nëse një sezon më parë Skënderbeu ishte i treti klub më i shtrenjtë pas Partizanit dhe Kukësit, tani korçarët janë të gjashtët, duke u lënë pas edhe nga Tirana, Teuta apo Vllaznia. Të dhëna këto që përkthehen edhe në fushën e lojës, pasi në bazë të performancës së tyre këtë sezon krahasuar me një kampionat më parë, janë dukshëm më poshtë në disa aspekte.

KRAHASIMI – Sezonin e kaluar Skënderbeu në 13 javët e para të kampionatit grumbullonte plot 29 pikë, duke u renditur i dyti në klasifikim, me vetëm dy pikë më pak se Partizani që kryesonte Kategorinë Superiore. Korçarët kishin marrë nëntë fitore dhe dy barazime, ndërsa kishin pësuar vetëm dy humbje. Vlerat e sezonit deri në këtë pikë shtoheshin më shumë edhe për faktin se në golavarazhin total Skënderbeu ishte në +11, me 17 gola të shënuar dhe 6 të pësuar.

Një ecuri mjaft pozitive duke qenë brenda objektivit primar, që u prish më pas me atë cikël të gjatë humbjesh që pësuan korçarët mes fazës së dytë dhe të tretë të kampionatit. I krahasuar me këtë sezon, Skënderbeu i këtij viti duket se ka diçka më pak, qoftë në pikë, ashtu edhe në gola. Në javën e 13-të tashmë bardhekuqtë janë në vendin e katërt me 20 pikë të grumbulluara (gjashtë fitore, dy barazime dhe pesë humbje). Shifra që tregojnë qartë se me mungesën e lojtarëve cilësorë dhe me eksperiencë, Skënderbeu nuk arrin dot të ruajë vijimësinë me rezultate pozitive, por ka shumë oshilacione nga njëra ndeshje në tjetrën. Këto shifra që bëhen edhe më të rënda kur sheh raportin mes golave të shënuar dhe atyre të pësuar.

Korçarët janë të vetmit (me Luftëtarin dhe Flamurtarin të lënë mënjanë) mes ekipeve që kanë një golavarazh negativ, – 7, duke pasur parasysh se kanë shënuar 15 gola dhe kanë pësuar 22 të tillë. Fakte këto që tregojnë qartazi se largimi i shumë futbollistëve që mbanin peshën për vite me radhë në mbrojtje si Radas e Vangjeli, por edhe elementëve të tjerë si Aliti e Abazi, e kanë dobësuar shumë Skënderbeun. Megjithatë, me një trajner ekspert si Daja, sërish korçarët kanë treguar se mund të mposhtin këdo.

LLAZI SARO

NDIQE LIVE "PANORAMA TV"

---