Moshat U-19/ Vllaznia dhe Teuta, “koka” grupi. Nisin ethet e “play off” për titullin

Panorama Sport | Lajmet e fundit nga sporti

Postuar: Maj 1, 2021 | 18:57


Moshat U-19/ Vllaznia dhe Teuta, “koka” grupi. Nisin ethet e “play off” për titullin

Kategoria Superiore për moshat U-19, luajti ndeshjet e javës së 26-të. “Panorama Sport”, ju sjell skedat e ndeshjeve të zhvilluara:

u-19

 

Tirana, një hap larg “play off”-it

1

Superndeshje për një vend në “play off”. Një gol i Gjumsit nga penalltia ka nderuar Tiranën e Alpin Gallos kundër Shkëndijës. Derbi ka qenë shumë i luftuar, për më tepër që të dyja skuadrat duan të sigurojnë një vend në katërshen e parë, në mënyrë që të jenë në fazën “play off”, aty ku do të diskutohet titulli kampion. Tashmë pas triumfit minimal ndaj Shkëndijës, bardhebluve të rinj u duhet edhe një pikë në ndeshjen e javës së fundit për të siguruar matematikisht katërshen. Si për ironi të fatit, Tirana e mbyll kampionatin e rregullt me derbi kundër Partizanit, që do të luhet të hënën në orën 12:00 në kompleksin “Skënder Halili”. Sa i përket takimit me skuadrën e shkollës së futbollit “Loro Boriçi”, që në minutën e 4-t bardheblutë fituan një penallti pas prekjes së topit me dorë nga Ruçaj. Nga pika e bardhë u tregua i saktë Gjumsi. Me rezultatin 0-1 u mbyll gjithçka, pavarësisht nga përpjekjet e të dyja skuadrave për të ndryshuar shifrat. ABDULLA DUSHKU

Spektakël i shkodranëve

2

Vllaznia është treguar e pamëshirshme edhe kundër Internacionalit, duke e mbyllur si kampione në Grupin A një javë para fundit të kampionatit. Shkodranët shënuan plot gjashtë gola, ku protagonist absolut ishte Ardit Nikaj me tripletë. Madje, ky i fundit humbi edhe një penallti. Golat e tjerë u realizuan nga Paloka dhe Musaraj që bëri dopietë. ADMIR URUÇI

Laçi shtang Partizanin

3

Laçi shtang Partizanin, duke i marrë një pikë në fund. Të kuqtë e drejtuar nga Reinaldo Kalari shënuan që në minutën e 29-të me anë të Koldashit. Në pjesën e dytë arritën të dyfishonin shifrat me Nikollën, mirëpo kurbinasit befasuan në 7 minutat e fundit. Lleshi rihapi takimin, ndërsa në minutat shtesë goli i Farrukut vulosi shifrat 2-2. ABDULLA DUSHKU

Goleadë në Durrës

4

Nëntë gola, spektakël dhe Dashi që bën heroin si zëvendësues duke shënuar tripletë. Teuta është zyrtarisht kampionia e Grupit B për të rinj dhe tashmë pret fazën “play off” për të synuar titullin kampion të U-19. Ndaj Butrintit ka qenë e vështirë, pasi miqtë shënuan katër herë. Brahimi bëri tripletë, por as kjo nuk mjaftoi për një pikë. ZAMIR QYPI

Skënderbeu, në katërshe

5

Skënderbeu feston ndaj Apolonisë kampione në fuqi dhe siguron një vend në katërshe një javë para fundit të kampionatit. I mjaftuan dy minuta ekipit korçar për të bërë diferencën ndaj fierakëve. Hysolli dhe Zguri shënuan dy gola të shpejtë, duke shokuar miqtë. Më pas ishte Venko që trefishoi, ndërsa goli i Mezanit vlejti për statistikë për Apoloninë. LLAZI SARO

Elbasani, leksion Besës

6

Besën e “zë vapa”, ndërsa Elbasani i jep leksion me pesë gola. Kavajasit e nisën mirë, pasi pjesën e parë e mbyllën 1-0 falë golit të Mustës. Mirëpo, për çudi, në pjesën e dytë elbasanasit u shndërruan dhe dominuan takimin. Bezati barazoi, ndërsa R.Musta, A.Gjolena dy herë dhe Kushta i dhanë fitoren skuadrës mike me golat e tyre. FERIZ FERIZAJ

Shkëlqen Pogradeci

7

Të rinjtë e Pogradecit bënë një superndeshje kundër moshatarëve vlonjatë, duke ndezur shpresat për të dalë nga zona e “play out”-it, edhe pse mbetet për t’u luajtur vetëm një takim. Alinji shënoi një gol spektakolar në minutën e 27-të. Në pjesën e dytë Pera i vetëm përballë portierit dyfishoi shifrat, ndërsa Likollari mendoi për 3-0. REDI DANDALLAKU

Të dyja në “play out”

8

Shkëndija e Durrësit dhe Dinamo kanë luajtur një ndeshje sa për formalitet mes tyre, pasi sido që të ishte rezultati, asgjë nuk do të ndryshonte për fatet e skuadrave. Tashmë të dyja janë në zonën “play out” dhe qëndrimi i tyre në Superiore do të varet nga ndeshja shtesë me skuadrat e Grupit B, si Pogradeci dhe Football Republic. JULIAN HASA

Derbi s’ka fitues

9

Një ndeshje mjaft e bukur dhe e luftuar ka qenë ajo mes të rinjve të Football Republic dhe Akademisë së Futbollit ose e cilësuar ndryshe si derbi mes ekipeve të Redi Jupit dhe Alban Bushit. Skuadra e Akademisë kaloi e para në epërsi me anë të Erjon Sinës. Rastet kanë qenë të shumta nga të dyja, ndërsa Sula barazoi në minutën e 59-të. ABDULLA DUSHKU

Shënkolli do historinë

0

Shënkolli likuidon Shkodrën dhe është gati për të kërkuar titullin kampion këtë sezon për U-19. Skuadra e drejtuar nga Haris Lika ka siguruar një vend në zonën “play off” dhe do të tentojë të bëjë historinë pas suksesit që arritën në sezonin e kaluar 17-vjeçarët. Në ndeshjen ndaj Shkodrës diferencën e bënë golat e S.Markut dhe Kodrës. PRENG GJIKOLA

29b 19a