Moshat U-19 | Partizani s’fal, Vlora në hall për fanella
KATEGORIA SUPERIORE, GRUPI A
Të kuqtë nuk përmbahen
Partizani fiton ndaj Briansit dhe vijon i qetë kryesimin në grupin A. Skuadra e Ylli Shehut ka disa elementë të shkëlqyer në përbërje, që bënë diferencën ndaj lezhjanëve. Lala dhe Agalliu shënuan për të kuqtë, ndërsa Briansi barazoi përkohësisht me Gegën. Gjatë fraksionit të dytë, loja ka qenë më e bukur dhe Partizani e ka merituar fitoren.
Abdulla Dushku
Tirana bën detyrën
Tirana e Astrit Hafizit ka bërë detyrën në ndeshjen e djeshme ndaj Laçit, duke fituar 2- 0. Golat u shënuan në fundin e pjesës së parë me autor Zenunin dhe Nuriun. Bardheblutë nuk e kanë vënë për asnjë moment në dyshim triumfin. Te skuadra e Hafizit po shkëlqejnë disa lojtarë këtë sezon, duke filluar nga Zenuni, Nuriu, Zhivanaj dhe Berisha.
Abdulla Dushku
Vllaznia tregon forcën
Vllaznia ka mposhtur Akademinë, duke treguar se do të jetë deri në fund pretendente për titull. Loja ka qenë e bukur në pjesën e parë, teksa në minutën e 14-të është Palushani që shënon supergol. Në fraksionin e dytë loja ka pasur faza të qeta, por Pusi dyfishoi shifrat. Akademia u mundua të reagonte, por gaboi para portës.
Abdulla Dushku
Bind Shkëndija e Tiranës
Shkëndija e Tiranës ka marrë një fitore të merituar në derbin me Internacionalin. Që në minutën e tretë pas një krosimi nga këndi, Mersinaj kërcen fuqishëm me kokë dhe shënon. Më pas, loja hyn në faza ekuilibri dhe është skuadra e Internacionalit më kërkuese. Megjithatë, Çokaj i dyfishon shifrat në pjesën e dytë, ndërsa Shehu vulos shifrat 2-1.
Abdulla Dushku
KATEGORIA SUPERIORE, GRUPI B
Flamurtari, gol që nga tuneli
Flamurtari ka arritur të triumfojë ndaj AF Dinamos që në start. Që pas shkelmimit të topit nga qendra, kapiteni Shkurti ka pasuar saktë te Sadushi, që gjuajti bukur dhe e dërgoi topin në rrjetë. Më pas loja ka qenë e bukur nga të dyja skuadrat, por Pjetra, Daci e Muça humbasin raste për shënim, ndërsa te vlonjatët shpërdorojnë Harruni e Bocaj.
Abdulla Dushku
Pogradeci thyen Teutën
Pogradeci thyen Teutën me golin e Bajraktarit, në një ndeshje të barabartë. Liqenorët arritën të marrin 3 pikë me mjaft vlera, duke gjetur avantazhin vetëm në minutën e 63-të. Teuta insistoi për të barazuar, duke krijuar një volum të madh loje, por nuk ishte e qartë përpara portës vendëse. Në fund, ata që festuan ishin pogradecarët.
Pëllumb Starova
Barazim dhe polemika
Skënderbeu dhe Elbasani kanë ndarë nga një pikë, por gjyqtari kryesor Sulko është kontestuar ashpër nga vendësit. Korçarët kanë pretenduar për 6 raste, kur gjyqtari mund të akordonte penallti. Katër minuta nga fundi, trajneri Jani Kaçi është ngritur nga pankina dhe i ka kërkuar llogari gjyqtarit, por ky i fundit e ka nxjerrë me karton të kuq.
Llazi Saro
Fitore mes tensionit
Lushnja ka fituar përmes polemikave me Dinamon. Blutë kaluan në avantazh me Tushën në pjesën e parë. Pas pushimit, Koreshi barazon me një goditje të saktë me kokë brenda zonës. Në minutën e 90-të gjyqtari Hoxha jep penallti për Lushnjën. Ndeshja ndërpritet pesë minuta pas kontestimeve të miqve. Koreshi shënon nga pika e bardhë dhe Lushnja fiton.
Alban Alushi
KATEGORIA E PARË, GRUPI A
KATEGORIA E PARË, GRUPI B
Vlora, hall për fanella
Futbolli i moshave në Shqipëri është në kufijtë e mbijetesës, teksa ka skuadra që nuk kanë as fanella për të luajtur. Rasti më i freskët është ai i ekipit të Vlorës, ku 19-vjeçarët e kësaj skuadre me të mbaruar ndeshja e paratërinjve, morën uniformat e tyre për të luajtur. Një situatë tragjikomike, ku ekipet diskutojnë edhe fanellat.
Vladimir Mema
NDIQE LIVE "PANORAMA TV"