Kategoria Superiore për moshat U-19, luajti këtë fundjavë ndeshjet e javës së 20-të, në të dyja grupet A dhe B, si dhe ndeshjet e Kategorisë së Parë, në javën e 19-të. Panorama Sport, ju sjell skedat e të gjitha ndeshjeve të zhvilluara.

Partizani shpërthen në derbin e të rinjve, duke i befasuar të gjithë me lojën që zhvilloi. Skuadra e Klevis Dalipit reagoi atëherë kur duhej në kampionat, pikërisht në një ndeshje që përjetohet shumë nga të rinjtë e të dyja skuadrave. Të kuqtë ishin të papërmbajtshëm, duke zhvilluar një nga lojërat më të bukura të këtij sezoni. Fitorja 4-0 ndaj Tiranës erdhi që në pjesën e parë.

Dalipi kishte orientuar skuadrën për të bërë presing që në start dhe goli i shpejtë i Çelës, ua bëri edhe më të lehtë “demave” të rinj. Bardheblutë e Alpin Gallos u tronditën dhe nuk e morën më veten as në pjesën e dytë.

GOLAT

Fillimisht në minutën e 17-të është Çela që pas një inkursioni personal depërton mes mbrojtësve dhe shënon golin e parë. Por, të kuqtë nuk stepen, pasi sulmojnë sërish me shumë forca dhe Serxhio Xhika do të realizojë me kokë golin e dytë pas krosimit të Nokës nga këndi. Te Tirana nuk u besojnë syve, por është sërish Çela që pa kaluar tre minuta nga dyfishimi i shifrave, e çon ndeshjen në 3-0.

Një ndeshje spektakolare në Yrshek, teksa qershia mbi tortë në 45 minutat e furishme të “demave” ishte goli i katërt, i shënuar nga mesfushori Besnik Ferati, i cili stërvitet edhe me ekipin e parë të Partizanit. Pas pushimit, bardheblutë e Gallos u munduan të reagonin, por të kuqtë e kishin shumë të thjeshtë për të menaxhuar rezultatin. Kjo bëri që Tirana të mos shënojë dot as golin e nderit në këtë derbi të rinjsh.

Një paraqitje zhgënjyese e bardhebluve, të cilët ndoshta e kishin nënvlerësuar Partizanin prej ecurisë jo të mirë në kampionat. Gjithçka u mbyll me shifrat 4-0 dhe arbitrin Zhuli që nxori nga xhepi plot gjashtë herë kartonin e verdhë. Nuk munguan as momentet e tensionit, por që u shuan shpejt. Javën e ardhshme “demat” kanë një transfertë delikate ndaj Vllaznisë, ndërsa Tirana do të luajë në shtëpi me Ilirinë.

 

 

NDIQE LIVE "PANORAMA TV"

---