Moshat U-17/ Shkodranët rikthehen me fitore në Kukës, shkëlqejnë Flamurtari e Partizani
U luajtën këtë javë ndeshjet e vlefshme për javën e 18-të në Kategorinë Superiore për moshat U-17. Vllaznia fitoi në një fushë të vështirë si ajo e Kukësit, me një dygolësh të Xhahysës, ndërsa 3 pikë morën edhe Flamurtari e Partizani. Më poshtë, rezultatet e të gjitha takimeve.
Pas hapit fals në javën e kaluar, Vllaznia ka reaguar menjëherë, madje në një transfertë të vështirë si ajo e Kukësit. Në ndeshjen e luajtur dje në stadiumin “Zeqir Ymeri”, shkodranët kanë fituar 0-2, falë golave të mesfushorit me tipare sulmuese, Rigers Xhahysa. Kuqeblutë kanë arritur të shënojnë nga një gol në secilën pjesë. Në fakt, loja ka qenë e ekuilibruar sepse edhe Kukësi ka kërkuar të reagojë pas golit të pësuar. Më kërkues vendësit ishin në pjesën e dytë, por në momentin më të mirë të tyre e pësuan. Ishte sërish Xhahysa, që në minutën e 71-të vulosi fitoren e kuqebluve. Ekipi shkodran në ndeshjet e fundit nuk ka kaluar një gjendje të mirë, por kjo fitore do ta ndihmojë shumë për një ecuri më të mirë në fazën e tretë. Tashmë, fitorja e Vllaznisë vë nën presion Tiranën, që luan në mesjavë ndaj Portos. Shkodranët do të tentojnë të fitojnë titullin edhe këtë sezon. Skerdilaid Sulozeqi
