Trajneri i Vllaznisë, Mirsad Jonuz, ësh të shprehur i kënaqur me tri pikët e arritura ndaj Partizanit. Për të ka qenë një triumf i merituar kundër kampionëve.

Maqedonasi, më shumë sesa lojës, duket se në fund të kësaj përballjeje i është gëzuar fitores që e fut sërish skuadrën shkodrane në vallen e ekipeve të mesit të tabelës së klasifikimit, madje ndoshta edhe për të kërkuar diçka më shumë se kaq.

Një fitore e rëndësishme, sidomos në aspektin e pikëve dhe atë psikologjik?

Normalisht që ishte një trepikësh mjaft i rëndësishëm dhe i merituar nga ekipi ynë. Një fitore e vështirë, pasi ishim në një ngarkesë psikologjike. Megjithatë, arritëm që t’ia mbyllim hapësirat e lojës skuadrës kundërshtare. Arritëm rezultatin që  donim duke administruar si duhet lojën, por edhe kundër një ekipi si Partizani që të krijon edhe tension.

Kampionët na kanë vënë në vështirësi, sidomos në krahun e djathtë, pasi edhe lojtarët kanë qenë më larg njëri-tjetrit. Duhet të rikuperojmë këto gabime që shfaqëm dhe të balancojmë më mirë repartet për ndeshjet e ardhshme. Ishte një takim i rëndësishëm, por kanë vlerë shumë tri pikët.

Ka pasur kritika ndaj jush…

Kemi marrë shumë kritika, por edhe kemi humbur shumë pikë. Gjithmonë kritikat janë të mira, por nganjëherë edhe nga vrasin. Unë jam i huaj këtu, por nuk është se ndihem si i tillë. Në Shkodër jam ndierë gjithnjë i respektuar dhe e them shpesh se jam në shtëpinë time të dytë. Unë kujtoj kur Shpëtim Duro ishte trajner me Shkëndijën e Tetovës dhe unë gjithmonë kam qenë pranë tij duke i ofruar miqësi dhe mbështetje. Mes kolegëve duhet mbështetje.

Kruja nga e majta…Ishte një gjë e re në këtë takim. Pse?

Po, kjo ishte e re. Loja e tij nga e majta e mbrojtjes nuk ishte provuar më parë. Në krahun e majtë ka qenë shumë e mirë. Jam shumë i kënaqur prej Krujës. Ndoshta kemi gjetur edhe një zgjidhje alternative për atë pozicion.

Përballë do të keni Flamurtarin në transfertë. Ç’mendim keni për këtë ndeshje?

Kemi vetëm tri ditë për t’u përgatitur për ndeshjen me Flamurtarin. Edhe ekipet e tjera si Teuta apo Bylisi kanë lënë pikë ndaj këtyre skuadrave, ndërsa shumëkush i ka menduar të fituara këto takime dhe më pas ka vuajtur tej mase. I bëj apel skuadrës të mos e ulë vigjilencën dhe duhet të jemi shumë të përgatitur për këtë përballje.

Si u ndjetë pa mbështetjen e publikut?

Situata që ne luajtëm pa publikun nuk është e mirë. Ndoshta kemi për të luajtur sërish pa ata, por kjo vërtet nuk është e mirë. Por gjithsesi, më i rëndësishëm është shëndeti i të gjithëve.

A luan më qetë skuadra pa tifozë?

Ne kemi luajtur ndeshje të bukura si kur kemi pasur mbështetje të madhe të publikut, por edhe kur nuk e kemi pasur atë mbështetje. Edhe në pjesën e parë me Partizanin bëmë disa gabime dhe na ndihmoi edhe fati. Prandaj nuk ka lidhje me apo pa publik.

ADMIR URUÇI – PANORAMASPORT.AL

NDIQE LIVE "PANORAMA TV"

---