Skënderbeu duhet të ruajë boshtin dhe të plotësojë ekipin me elementë të rinj dhe cilësorë për t’i qëndruar objektivit të prezantuar nga Migen Memelli. Ky ka qenë mendimi i ish-sulmuesit të Skënderbeut, Dhimitraq Xhambazi.

Në një prononcim të dhënë për “Panorama Sport”, ikona e klubit bardhekuq është shprehur besimplotë se me Memellin në krye të pankinës, Skënderbeu ka mundësinë që të ecë më lart sesa në sezonin që lamë pas. Për Xhambazin trajneri aktual i Skënderbeut e tregoi në këtë sezon se është i duhuri për këtë ekip dhe se mund të çojë lart bardhekuqtë, për këtë vlerëson si lëvizjen e duhur nga ana e klubit.

“Mund të them se Skënderbeu i sezonit të ri ka bërë një nisje të mbarë, duke konfirmuar trajnerin. Migen Memelli e tregoi se është i duhuri për këtë skuadër dhe diti ta ngrejë nivelin e ekipit që deri para ardhjes së tij dukej i pashmangshëm për të rënë një kategori më poshtë, kështu që mendoj se kjo ishte lëvizja e duhur nga ana e drejtuesve për të pasur garancinë e trajnerit fillimisht dhe më pas për të ndërtuar ekipin që do të garojë me bindje drejt objektivit të ri të vendosur për sezonin e ardhshëm”, theksoi fillimisht Xhambazi.

EKIPI – Më tej ish-sulmuesi i Skënderbeut ka folur rreth grupit që kanë korçarët në dispozicion dhe plotësimeve të cilat janë të nevojshme për sezonin e ardhshëm. Për Xhambazin boshti duket se është i ndërtuar tashmë dhe mbetet premtues, ndërsa duhet të konfirmohen disa lojtarë dhe të shtohen alternativat në dispozicion të trajnerit në disa reparte. “Mund të them se Skënderbeu i sezonit të ardhshëm bazën e lojtarëve e ka fituar tashmë.

Memelli ka fituar një bosht lojtarësh që do ta ketë gati për sezonin e ri. Duhet vetëm konfirmimi i disa elementëve që janë në fund të kontratës dhe plotësimi i lojtarëve të larguar. Nëse shohim portën dhe mbrojtjen, mund të them se grupi është. Po ashtu edhe pjesa tjetër e ekipit. Për mendimin tim, Skënderbeu ka nevojë për ndonjë lojtar me eksperiencë siç ishte Zguro në sezonin e kaluar dhe më pas të shtojë alternativat cilësore në dispozicion të trajnerit për të mos pasur mangësi gjatë sezonit”, theksoi Xhambazi.

LLAZI SARO – PANORAMASPORT.AL

NDIQE LIVE "PANORAMA TV"

---